سابق وزیراعظم نوازشریف اپنا علاج مکمل ہونے تک وطن نہیں آئیں گے، احسن اقبال

لاہور: اسلام آباد ہائی کورٹ کی جانب سے نواز شریف کی طلبی کے باوجود پاکستان مسلم لیگ (ن) نے واضح کر دیا ہے کہ سابق وزیراعظم اپنا علاج مکمل کروا کر ملک واپس آئیں گے۔

لاہور میں مسلم لیگ نواز کے مرکزی سیکرٹری جنرل احسن اقبال، خواجہ آصف، رانا ثناء اللہ سمیت دیگر رہنماوں نے مشترکہ پریس کانفرنس کی اور کہا کہ مسلم لیگ (ن) نے نواز شریف کو درخواست کرنے کا فیصلہ کیا ہے کہ وہ اپنا علاج جاری رکھیں اور علاج مکمل کروانے کے بعد  ہی واپس آئیں ۔

نون لیگ کے سیکرٹری جنرل احسن اقبال نے کہا کہ نواز شریف بیرون ملک گئے تو کورونا کی وجہ سے دنیا بھر میں علاج کی سہولتیں معطل رہیں۔ امید ہے کہ عدلیہ بھی نواز شریف کی صحت کے معاملات کو ملحوظ خاطر رکھے گی۔ نواز شریف نے اپنی بیمار اہلیہ کو بستر مرگ پر چھوڑا کر قانون کی عملدرای کے لئے وطن واپس آئے تھے۔

اپنی بات جاری رکھتے ہوئے احسن اقبال کا مزید کہنا تھا کہ جیسے ہی ڈاکٹروں نے (ن) لیگ کے قائد کو مکمل علاج کا سرٹیفکیٹ دیا تو وہ فورا واپس آ جائیں گے۔ نواز شریف کی غیرموجودگی میں ان کے مقدمات کی قانونی پیروی جاری رہ سکتی ہے۔ پارٹی کی متفقہ رائے سے یہ فیصلہ کر کے نواز شریف کو اپنا علاج مکمل کروانے کی درخواست کی جا رہی ہے۔

انہوں نے کہا کہ نواز شریف کی صحت و زندگی کا فیصلہ ٹی وی شوز میں نہیں ہو سکتا۔ نواز شریف کے علاج کی رپورٹس عدالت میں جمع کروا دی گئی ہیں اور آئندہ بھی کر دی جائیں گی، نواز شریف کو بیرون ملک جانے کی اجازت علاج کے لئے ملی تھی ۔جب معالجین صحت یابی کا فیصلہ کریں گے تو ہی وہ واپس آئیں گے ۔عدالتی معاملات پر ہماری قانونی ٹیم ہی فیصلہ کرے گی۔