آرمی چیف نے فیٹف پر کلیدی کردار ادا کیا،وزیر اعظم کی جنرل باجوہ کی تعریف

اسلام آباد : وزیراعظم شہبازشریف نے پاکستان کے فنانشل ایکشن ٹاسک فورس کی گرے لسٹ سے نکلنے پر تشکر کا اظہار کیا ہے۔

وزیراعظم شہباز شریف نے اپنے ایک بیان میں کہا ہے کہ اللہ کا شکر ہے پاکستان کو فیٹف کی گرے لسٹ سے نجات ملی،عالمی سطح پر پاکستان کی ساکھ اور وقار کی بحالی قوم کو مبارک ہو۔دہشتگردی کیخلاف جنگ میں یہ ہماری عظیم قربانیوں کا اعتراف ہے، انسداد دہشتگردی کیلئے پاکستان کی کاوشوں کو دنیا نے تسلیم کیا ہے۔

وزیراعظم شہباز شریف نے کہا کہ فیٹف میں شامل ممالک کا شکریہ، پاکستان کےمؤقف کو تسلیم کیا، وزیرخارجہ بلاول بھٹو، تمام متعلقہ حکام اور وزارتوں کو مبارک باد ہو، افواج پاکستان، ڈی جی ایم او سمیت دیگر تمام ٹیم کو مبارک باد دیتا ہوں۔

شہباز شریف کا کہنا تھا کہ آرمی چیف کو اس کامیابی میں کلیدی کردار پر سراہتاہوں اور مبارک باد دیتا ہوں، اتحادی جماعتوں اور قائدین کا بھی شکریہ جنہوں نے بھرپور تعاون سے یہ ممکن بنایا۔