آرمی چیف کا ایل او سی کا دورہ، اگلے مورچوں پر تعینات فوجی جوانوں سے ملاقات

آرمی چیف جنرل قمر جاوید باجوہ نے لائن آف کنٹرول کا دورہ کیا ہے جہاں انہوں نے نوسیر سیکٹر میں اگلے مورچوں پر تعینات افسران اور جوانوں سے ملاقات کی ہے۔

آئی ایس پی آر کے مطابق آرمی چیف جنرل قمر جاوید باجوہ نے لائن آف کنٹرول پر نوسیری سیکٹر کا دورہ کیا۔ اگلے مورچوں پر تعینات افسران و جوانوں سے ملاقات کی، جنرل قمر جاوید باجوہ کو لائن آف کنٹرول کی تازہ ترین آپریشنل صورتحال پر بریفنگ دی گئی۔

ترجمان پاک فوج کے مطابق آرمی چیف کو فارمیشن کی آپریشنل تیاریوں سے بھی آگاہ کیا گیا۔ آرمی چیف نے دستوں کے پیشہ وارانہ امور، ہمہ وقت چوکنا رہنے اور آپریشنل تیاریوں کو سراہا۔

ترجمان پاک فوج کا کہنا ہے کہ اس سے پہلے آرمی چیف کے ایل او سی پہنچنے پر کور کمانڈر راولپنڈی لیفٹیننٹ جنرل ساحر شمشاد مرزا نے ان کا خیرمقدم کیا۔