عمران خان پرحملہ،پنڈی میں جگہ جگہ مظاہرے،جلائوگھیرائو

اسلام آباد : پاکستان تحریک انصاف کے کارکنوں نے اسلام آباد ایئرپورٹ جانے والے راستے ٹائرجلا کر بند کردیئے۔مسافروں کی پروازیں چھوٹ جانے کا خدشہ پیدا ہوگیا۔۔پولیس اور رینجرز کے دستے بھجوا دیئے گئے۔راولپنڈی کے مری روڈ سمیت مختلف علاقوں میں بھی احتجاج کیا گیا۔ایمولینسز بھی پھنس گئیں۔

تحریک انصاف کے کارکنوں نے 15 مختلف مقامات پر مظاہرے کئے۔جس کی وجہ سے جی ٹی روڈ ٹیکسلا، روات، ائرپورٹ روڈ اور مری روڈ پر ٹریفک کا نظام شدید درہم برہم ہوگیا۔راولپنڈی کی مرکزی شاہراہ مری روڈ شمس آباد پرپی ٹی آئی کارکنوں نے ٹائر جلاکر نعرے بازی کی۔

راولپنڈی سے اسلام آباد جانے والی اہم شاہراہیں بند ہونے سے جڑواں شہروں کے درمیان ایمبولینس سروس معطل ہوگئی اور مریضوں کواسپتال منتقل کرنے والی متعدد گاڑیاں ٹریفک میں پھنس گئیں۔

پی ٹی آئی کارکنوں نے جی ٹی روڈ رتہ شاہ چوک۔مارگلہ کو دونوں جانب سے بلاک کرکے احتجاج کیا۔جس کی وجہ سے ٹریفک اور مقامی آبادی و دکان داروں کو دشواری کا سامنا کرنا پڑا۔

شمس آباد سے مری روڈ کو جانے والا راستہ دونوں طرف سے بند کیے جانے کے باعث تعلیمی اداروں سے گھر جانے والے طلبہ شدید پریشانی کا شکار رہے۔

مظاہرین نے ٹائر جلا کرلاہور اور پشاور موٹروے سے اسلام آباد آمد ورفت کے راستے بند کردیئے۔مظاہرین نے پیرودھائی، اولڈ ائیرپورٹ روڈ پر بھی احتجاج کرکے مرکزی شاہراوں پر ٹریفک معطل کردی۔

احتجاجی مظاہروں کے دوران پی ٹی آئی رہنما فیاض الحسن چوہان

اور کارکنوں میں جھگڑے کا ایک واقعہ بھی سامنے آیا۔پی ٹی آئی کارکن نے الزام عائد کیا کہ فیاض الحسن چوہان نے انہیں تھپڑ مارا ہے، جب کہ پی ٹی آئی رہنما کا کہنا ہے کہ انہوں نے تھپڑ نہیں مارا۔

مری روڈ پراحتجاج کے دوران ایک کارکن بجلی کے کھمبے پر چڑھا، کرنٹ لگنے سے نیچے گر گیا، جسے تشویشناک حالت میں اسپتال منتقل کردیا گیا۔

دوسری جانب راولپنڈی میں امن وامان کی خراب صورتحال کے پیش نظر راولپنڈی انتظامیہ نے دو دن کےلئے تمام تعلیمی اداروں کو بند کرنے کا اعلان کردیا۔