آڈیو لیک کا معاملہ: سابق وزیر خزانہ شوکت ترین کیخلاف مقدمہ درج

اسلام آباد : ایف آئی اے کے سائبر کرائم ونگ نے سابق وفاقی وزیر خزانہ شوکت ترین کے خلاف مقدمہ درج کرلیا ہے۔

ایف آئی اے کے سائبر کرائم ونگ نے شوکت ترین کیخلاف مقدمہ پیکا ایکٹ کے تحت درج کیا ہے، ان کیخلاف مقدمے کا مدعی ارشد محمود ولد غلام سرور ہے، شوکت ترین پر مقدمہ ان کی سوشل میڈیا پر وائرل مبینہ آڈیو کی بنیاد پر درج کیا گیا ہے۔

ایف آئی اے سائبرکرائم ونگ میں درج ایف آئی آر کے مطابق مبینہ آڈیو میں تیمور سلیم جھگڑا اور محسن لغاری سے شوکت ترین گفتگو کر رہے ہیں، مبینہ آڈیو میں بدنیتی پر مبنی گفتگو کی گئی، مبینہ آڈیو میں شوکت ترین نے محسن لغاری کو کہا کہ وفاقی حکومت کو سرپلس بجٹ واپس نہ کیا جائے۔

شوکت ترین کے خلاف مقدمہ بغاوت اور اشتعال انگیزی کی دفعات کے تحت درج کیا گیا ہے۔

گزشتہ روز وفاقی وزیر داخلہ رانا ثناء اللہ کا کہنا تھا کہ شوکت ترین کیخلاف انکوائری مکمل ہو گئی ہے اور حکومت نے انہیں گرفتار کرنے کی اجازت دے دی ہے، ایف آئی اے نے شوکت ترین کی گرفتاری کی اجازت مانگی تھی۔