سیاسی و عسکری قیادت کی عمران خان پرفائرنگ کی مذمت،وزیراعظم کا نوٹس

وزیراعظم شہباز شریف نے وفاقی وزیر داخلہ رانا ثنا اللہ کو ہدایت کی ہے کہ آئی جی پنجاب اور چیف سیکریٹری پنجاب سے رپورٹ طلب کریں۔وزیراعلیٰ پنجاب چودھری پرویزالہٰی نے فائرنگ کے واقعے کو ناقابل برداشت قرار دیتے ہوئے کہا ہے کہ اللہ تعالیٰ کا شکر ہے کہ عمران خان خیریت سے ہیں۔

وفاقی وزیر داخلہ رانا ثنااللہ نے فائرنگ کے واقعے کی مذمت کرتے ہوئے گہری تشویش کا اظہار کیا ہے۔ انہوں نے وزیراعظم کی ہدایت پر چیف سیکریٹری پنجاب اور آئی جی پنجاب سے واقعے کی رپورٹ طلب کر لی ہے۔وزیر داخلہ رانا ثنا اللہ نے فائرنگ کے واقعے کی وفاقی سیکیورٹی ایجنسیز سے بھی رپورٹ طلب کر لی ہے۔

پنجاب اسمبلی میں قائد حزب اختلاف حمزہ شہباز نے عمران خان کے کنٹینر پر فائرنگ واقعے کی شدید مذمت کرتے ہوئے کہا ہے کہ زخمی افراد کی جلد صحتیابی کے لیے دعا کرتا ہوں، اللہ تعالیٰ سب کو حفظ و امان میں رکھے، آمین۔حمزہ شہباز نے مطالبہ کیا ہے کہ حکومت پنجاب لانگ مارچ کی سیکیورٹی کے لیے کیے جانے والے انتظامات کی بابت آگاہ کرے۔

سابق وزیراعظم نوازشریف اور ان کی صاحبزادی مریم نواز نے بھی عمران خان کی جلد صحت یابی کےلئے دعا کی ہے۔وزیرخارجہ بلاول بھٹو۔آصف علی زرداری سمیت دیگر سیاسی قائدین نے بھی عمران خان پرفائرنگ کی مذمت کرتے ہوئے ان کی جلد صحتیابی کےلئے دعا کی۔

دوسری جانب آئی ایس پی آر کا کہنا ہے کہ گوجرانوالہ میں فائرنگ کے واقعے کی شدید مذمت کرتے ہیں۔عمران خان سمیت دیگر زخمیوں کی جلد صحت یابی کےلئے دعا گو ہیں۔انسپکٹر جنرل پولیس پنجاب فیصل شاہکار نے چیئرمین پی ٹی آئی عمران خان کے کنٹینر پر کی جانے والی فائرنگ کے واقعے کا نوٹس لیتے ہوئے آر پی او گجرات سے رپورٹ طلب کر لی ہے۔
آئی جی پنجاب نے ڈی پی او گجرات کو فوری طور پر موقع پر پہنچنے کی ہدایت کرتے ہوئے کہا ہے کہ واقعے کی ہر پہلو سے انکوائری کی جائے اور فائرنگ کرنے والے ملزمان کو قانون کے کٹہرے میں لایا جائے۔