آئی ایم ایف کی شرط ،پاورسیکٹر میں ٹارگیٹڈ سبسڈی کے لیے نئی حکمت عملی تیار

 اسلام آباد: حکومت نے آئی ایم ایف کی شرط پرپاورسیکٹر میں ٹارگیٹڈ سبسڈی کے لیے نئی حکمت عملی تیار کرلی۔لائف لائن صارفین کا دائرہ کار50 سے بڑھا 100 یونٹ تک بڑھایا جائے گا جبکہ 200 یونٹ والے صارفین کے لیے پروٹیکٹڈ صارفین کی نئی کٹیگری بنانے کی تجویز ہے۔

 پاور ڈویژن حکام کے مطابق 200 یونٹ والے صارفین کے لیے پروٹیکٹڈ صارفین کی نئی کٹیگری بنانے کی تجویز ہے جبکہ 301سے 700 یونٹ کے سلیب کو چارمزید سلیبز میں تقسیم کیا جا ئے گا۔ تجویز ہے کہ 301 سے 400 یونٹ ، 401 سے 500 اور 501 سے 600 یونٹ کے نئے سلیبز بنائے جائیں۔601 سے 700 یونٹ والے صارفین کا بھی الگ سلیب بنانے کی تجویز دی گئی ہے۔

ذرائع کے مطابق نئے سلیبز بنانے سے ٹیرف اسٹرکچر پر کوئی فرق نہیں پڑے گا ، اقدام کا مقصد پاورسیکٹر سبسڈی مخصوص صارفین تک منتقل کرناہے ۔پاور ڈویژن کی جانب سے نیپرا میں دائر درخواست کی سماعت 9 اگست کو ہو گی۔