وفاقی وزیر عبدالعلیم خان کی چینی سفیر سے ملاقات، انجینئرز کے حادثہ پر اظہار افسوس

وفاقی وزیر برائے نجکاری، سرمایہ کاری بورڈ و مواصلات عبدالعلیم خان اسلام آباد میں چین کے سفارتخانہ گئے جہاں انہوں نے چینی سفیر جیانگ زید ڈونگ سے ملاقات کی اور حالیہ دنوں چینی انجینئرز کے ساتھ پیش آنے والے حادثہ پر دلی دکھ اور گہرے رنج و غم کا اظہار کیا۔

جمعہ کو جاری پریس ریلیز کے مطابق عبدالعلیم خان نے چینی سفیر سے گفتگو کرتے ہوئے کہا کہ پاک چین دوستی خطے میں معاشی استحکام اور امن کی علامت ہے۔ انہوں نے کہا کہ چین اور پاکستان کے مابین گہری رفاقت اور دو طرفہ روابط کو نقصان نہیں پہنچایا جا سکتا۔عبدالعلیم خان نے کہا کہ چینی انجینئرز کی اموات پر ہر پاکستانی رنجیدہ اور دل گرفتہ ہے۔

وفاقی وزیر عبدالعلیم خان نے چینی سفارتخانہ میں موجود کتاب میں تاثرات درج کرتے ہوئے حادثے کا شکار ہونے والے چینی انجینئرز کے خاندانوں سے دلی ہمدردی اور دلجوئی کا اظہار کیا۔پاکستان میں چین کے سفیر جیانگ زید ڈونگ نے وفاقی وزیر عبدالعلیم خان کی سفارتخانہ آمد پر تشکر کا اظہار کیا اور اُن کے جذبات کا شکریہ ادا کیا۔

مزید خبروں کیلئے وزٹ کریں