پی آئی اے نے سعودی عرب میں رہنے والے تارکین وطن کا دیرینہ مطالبہ پورا کردیا

سعودی عرب میں رہنے والے پاکستانیوں کا دیرینہ مطالبہ پورا ہو گیا، قومی ایئرلائن نے سعودی عرب کے شہر القسیم کے لئے براہ راست پروازیں شروع کرنے کا فیصلہ کرلیا ہے۔

پاکستان انٹرنیشنل ایئر لائن نے سعودی عرب میں کام کرنے والے لاکھوں پاکستانیوں کا دیرینہ مطالبہ پورا کر دیا ہے، پی آئی اے نے القسیم کے لیے پروازں کے باقاعدہ آغاز کا اعلان کر دیا ہے، پہلی پرواز اٹھارہ نومبر کو شروع ہوگی۔سعودی عرب کے وسط میں واقع القسیم شہر میں کئی لاکھ پاکستانی ملازمت کے سلسلے میں قیام پذیر ہیں ۔

سعودی عرب کے شہروں القسیم اور البریدہ میں رہنے والے پاکستانیوں کا عرصہ دراز سے مطالبہ تھا کہ ریاض اور جدہ کے ساتھ ساتھ ان شہروں سے بھی براہ راست پروازیں شروع کی جائیں۔ پی آئی اے کی پہلی پرواز 18 نومبر بروز بدھ ملتان سے روانہ ہوگی۔ سعودی ایئر پورٹ حکام کی جانب سے پرواز کو واٹر کینن سلوٹ دیا جائے گا۔

پی آئی اے کے ترجمان کی جانب سے جاری بیان میں بتایا گیا ہے کہ پی آئی اے کی جانب سے القسیم کے لئے پروازیں بدھ اور جمعہ کے روز بالترتیب ملتان اور اسلام آباد سے روانہ ہوں گی۔ ان پروازوں پر 40 کلو سامان کی حد کے ساتھ تعارفی کرایہ بھی لاگو ہوگا۔