حکومت کا چیف جسٹس آف پاکستان کیخلاف ریفرنس لانے کا فیصلہ

اسلام آباد : وفاقی حکومت نے چیف جسٹس عمر عطاء بندیال کے خلاف مس کنڈکٹ کے الزام میں ریفرنس لانے کا فیصلہ کرلیا۔ ایوان نے ریفرنس کو حتمی شکل دینے کیلئے خصوصی کمیٹی تشکیل  دینے کی تحریک کی بھی منظوری دے دی۔ ایوان نے جناح ہاؤس، جی ایچ کیو اور دیگر سرکاری املاک پر حملوں کے خلاف مذمتی قرارداد بھی منظور کرلی۔

اسپیکر راجہ پرویز اشریف کی کی زیر صدارت اجلاس میں خاتون رکن اسمبلی شازیہ ثوبیہ سومرو نے چیف جسٹس کے خلاف ریفرنس لانے کیلئے خصوصی کمیٹی قائم کرنے کی تحریک پیش کی جسے کثرت رائے سے منظور کرلیا گیا۔

ریفرنس کو حتمی شکل دینے کے لیے خصوصی پارلیمانی کمیٹی تشکیل دی جائے گی، کمیٹی میں مختلف جماعتوں کے ارکان شامل ہوں گے جن میں محسن شاہنواز، خورشید جونیجو، صلاح الدین ایوبی، شہناز بلوچ، صلاح الدین اور دیگر ارکان شامل ہیں۔

تحریک میں کہا گیا کہ کمیٹی چیف جسٹس کے سوا دیگر ججز کے مس کنڈکٹ پر بھی ریفرنس لانے کا جائزہ لے گی۔ ایوان میں تحریک انصاف کی خاتون رکن اسمبلی وجیہہ قمر نے جناح ہاؤس، جی ایچ کیو اور دیگر سرکاری املاک پر حملوں کے خلاف مذمتی قرارداد پیش کی جسے ایوان میں منظور کرلیا گیا۔

ایوان نے سیاسی جماعت کے ملوث رہنماؤں کے خلاف قانونی کارروائی کیلئے بھی قرارداد منظور کرلی جس میں حکومت سے سیاسی جماعت اور اس کے انتشاری رہنماؤں کے خلاف قانون کے مطابق سخت ترین کارروائی کا مطالبہ کیا گیا ہے اور ایسے شرپسند عناصر کامستقبل میں قلع قمع کرنے کیلئے قانون سازی کی تجویز دی گئی ہے۔ قومی اسمبلی نے اپنی بہادر اور جری افواج کے ساتھ بھرپور یکجہتی کا بھی اظہار کیا۔