گریٹر اقبال پارک واقعہ:ٹک ٹاکرعائشہ اکرام کا ساتھی ریمبو رگرفتار،ویڈیو بیان جاری

 لاہور: گریٹر اقبال پارک میں ہراساں ہونے والی ٹک ٹاکر عائشہ اکرام کے کیس میں اہم پیشرفت ہوئی ہے، پولیس نے عائشہ اکرام کے بیان پر کارروائی کرتے ہوئے اس کے ساتھی ریمبو کو حراست میں لے لیا۔ عائشہ اکرم نے تمام واقعے کا ذمہ دار اپنے ساتھی ریمبو کو ٹھہرا یا ہے۔

پولیس حراست میں ریمبو نے میڈیا کے سامنے بیان میں کہاہے کہ مجھے پتا ہے اس لڑکی کو کیسے میں پارک سے زندہ نکال کر گھر لے گیا اور عائشہ اکرام نے مجھے ہی کیس میں نامزد کردیا، یہ میری غلطی ہے اور نہ عائشہ اکرام کی غلطی ہے، مینار پاکستان جانے کا پلان میرا نہیں بلکہ عائشہ اکرام کا تھا، اس نے کسی اور کے ساتھ جانا تھا، لیکن جس کے ساتھ جانا تھا اس کے بھائی کا انتقال ہوگیا تھا جس کی وجہ سے مجھے عائشہ کے ساتھ جانا پڑا۔

 گزشتہ روز عائشہ نے ڈی آئی جی انوسٹی گیشن کو تحریری بیان جمع کروا دیا جس میں کہا گیا کہ گریٹر اقبال پارک جانے کا پلان ریمبو نے ہی بنایا تھا، ریمبو نے اپنے ساتھیوں کے ہمراہ میری نازیبا ویڈیوز بنارکھی ہیں، ان ویڈیوز کی وجہ سے ریمبو مجھے بلیک میل کرتا رہا ۔عائشہ اکرم نے الزام لگایا کہ ریمبو مجھے بلیک میل کرکے دس لاکھ روپے لے چکا ہے ، میں اپنی تنخواہ میں سے آدھے پیسے ریمبو کو دیتی تھی ۔ ریمبو اپنے ساتھی بادشاہ کے ساتھ مل کر ٹک ٹاک گینگ چلاتا ہے ۔