انسداد کورونا ایس او پیز کی وجہ سے آئندہ برس حج مہنگا ہوسکتا ہے، وزیرمذہبی امور

وفاقی وزیربرائے مذہبی امور نورالحق قادری نے آئندہ برس حج اخراجات میں اضافے کا عندیہ دیتے ہوئے کہا ہے کہ انسداد کورونا ویکسین اور ایس اوپیزکے باعث آئندہ برس حج مہنگا ہوسکتا ہے۔

کراچی میں حج آرگنائزرگروپ کے ساتھ اجلاس کے بعد میڈیا سے گفتگو میں وفاقی وزیر مذہبی امور نور الحق قادری نے آئندہ برس حج مہنگا ہونے کا عندیہ دیتے ہوئے کہا کہ آئندہ حج کے لیے سعودی حکام سے زیادہ سے زیادہ سہولتیں حاصل کریں گے۔

پیر نورالحق قادری نے کہا کہ اگر لازمی ہوا تو تمام عازمین حج کو کورونا ویکسین لگائی جائیں گی۔ ایس او پیز کی وجہ سے حج مہنگا ہوسکتا ہے تاہم حکومت کی بھرپور کوشش ہوگی کہ عازمین کو گزشتہ حج کی طرح مشکلات نہ ہوں۔کرایوں کا تعلق ایئرلائن سے ہے،ایس او پی کے ساتھ کرائے بہت بڑھ گئے لیکن کوشش کریں گے کہ کم سے کم کرائے مقرر کرائے جائیں۔

وفاقی وزیر مذہبی امور نورالحق قادری نے مزید کہا کہ حج 2021 کے بارے میں سعودی حکام کی وزارت حج و عمرہ کی جانب سے ابھی تک کوئی پیشکش نہیں کی گئی ہے تاہم جیسے ہی کوئی پیشکش ہوئی تو پھر حج پالیسی کا لائحہ عمل طے کریں گے۔