بزدل دشمن کا وار: بارودی سرنگ دھماکے میں افسرسمیت 3جوان شہید، 4زخمی

راولپنڈی: بزدل دہشت گردوں کی جانب سے ایک بار پھر امن پر وار کیا گیا ہے، شمالی وزیرستان میں بارودی سرنگ  کے دھماکہ سے پاک فوج کے لیفیٹننٹ ناصرحسین  سمیت تین جوان وطن  پر قربان ہوگئے۔

شمالی وزیرستان میں سیکیورٹی فورسزکی گاڑی دہشت گردوں کے نصب کردہ دیسی ساختہ بارودی سرنگ سے ٹکرا گئی جس کے نتیجے میں افسر سمیت تین اہلکار شہید اور 4 زخمی ہوگئے ہیں۔

مسلح افواج کے شعبہ تعلقات عامہ (آئی ایس پی آر) کے مطابق دہشت گردوں نے سڑک کنارے دیسی ساختہ بم (آئی ای ڈی) نصب کیا تھا۔ آئی ای ڈی دھماکا گیریژن سیکٹر میں شگان شپا روڈ  کے مقام پر ہوا۔سیکیورٹی فورسزکے جوان سڑک تعمیرکرنے والی ٹیم کو تحفظ فراہم کرنے کی ذمے داریوں پر مامور تھے۔

آئی ایس پی آر کی جانب سے جاری بیان کے مطابق بارودی سرنگ دھماکے کے نتیجے میں لیفٹیننٹ ناصرحسین ،نائک محمدعمران اور سپاہی عثمان اخترشہید جب کہ چار اہل کار زخمی ہوگئے۔ سیکیورٹی فورسزنے جائےحادثہ کو گھیرےمیں لے کر علاقے میں سرچ آپریشن جاری ہے۔

مسلح افواج کے شعبہ تعلقات عامہ کا کہنا ہے کہ لیفٹیننٹ ناصر حسین شہید ایک ہونہار کیڈٹ تھے۔ انہوں نے پی ایم اے میں غیر معمولی کارکردگی کا مظاہرہ کیا۔ بہترین کارکردگی پر لیفٹیننٹ ناصر حسین شہید کو تربیت مکمل کرنے کیلئے رائل ملٹری اکیڈیمی ڈنٹرون آسٹریلیا بھیجا گیا تھا۔

مادر وطن پر جان قربان کرنے والے دیگر شہدا میں شہید نائیک محمد عمران کا تعلق فیصل آباد سے جبکہ سپاہی عثمان اختر کا تعلق راولپنڈی سے ہے۔