دورہ روس پر عمران خان کی حکومت جاتی تو ہم اس وقت روس کے خلاف کھڑے ہوتے، بلاول بھٹو

اسلام آباد : وزیرخارجہ بلاول بھٹو نے کہا ہے کہ عمران خان کے دورہ روس کو عدم اعتماد سے جوڑنا بہت بڑی غلط فہمی ہے۔ کا ثبوت یہ ہے کہ روس یوکرین تنازعہ میں عمران حکومت کی طرح ہم بھی غیرجانبدار ہیں۔ اگر دورہ روس پچھلی حکومت جانے کی وجہ ہوتی تو اس جنگ سے متعلق ہمارا موقف مختلف ہوتا۔

وزیرخارجہ بلاول بھٹو پارلیمنٹ ہاوس میں میڈیا سے گفتگو کرتے ہوئے کہا کہ عمران خان کے دورہ روس کو عدم اعتماد سے جوڑنا بہت بڑی غلط فہمی ہے۔ اس کا ثبوت یہ ہے کہ روس یوکرین تنازعہ میں عمران حکومت کی طرح ہم بھی غیرجانبدار ہیں۔ اگر دورہ روس پچھلی حکومت جانے کی وجہ ہوتی تو اس جنگ سے متعلق ہمارا موقف مختلف ہوتا۔

بلاول بھٹو نے کہا کہ روس یوکرین معاملہ پر پاکستان کل بھی نیوٹرل تھا اور آج بھی ہے۔ روس یوکرین جنگ سے پہلے پاکستان یوکرین سے کھاد، گندم اور دیگر غذائی اجناس خرید رہا تھا۔ اس جنگ کی وجہ سے ہمیں مزید فوڈ سیکیورٹی کا چیلینج درپیش ہے۔ ہم چاہتے ہیں کہ یہ تنازعہ فریقین کے درمیان سفارتکاری اور بات چیت سے حل ہو۔  ہم چاہتے ہیں یہ جنگ جلد ختم ہو۔

وزیرخارجہ بلاول بھٹو نے کہا کہ مہنگائی کی صورت میں اس جنگ کا پاکستان کے عوام سمیت دنیا بھر کو نقصان ہورہا ہے۔ ایران پاکستان گیس پائپ لائن کی بنیاد آصف زرداری نے رکھی تھی۔ اس منصوبے میں پابندیوں کو مدنظر رکھ کر مثبت پیش رفت چاہتے ہیں۔ بلاول بھٹو کا کہنا تھا کہ اس منصوبے کے فریم ورک پر پیشرفت چاہتے ہیں۔ پاک ایران تعلقات میں کافی گنجائش موجود ہے۔