عمران خان کا الیکشن کمشنر کیخلاف عدالت جانے کا اعلان

گوجرانوالہ: پاکستان تحریک انصاف کے چیئرمین عمران خان نے سابق وزیراعظم نوازشریف کو وطن واپس آکر اپنے مقابلے میں الیکشن لڑنے کا چیلنج دے دیا۔گوجرانوالہ میں لانگ مارچ کے شرکا سے خطاب میں عمران خان نے کہا کہ باہرسے اسکرپٹ دی جاتی ہے کہ روس سے سستا تیل نہیں لینا، امریکا سے این او سی لی جاتی ہے کہ روس سے تیل لے سکتے ہیں یا نہیں۔چیف جسٹس صاحب! ہماری تحریک اور ساری قوم آپ کی طرف دیکھ رہی ہے۔

عمران خان کا کہنا تھا کہ میرا جینا مرنا پاکستان میں ہے۔میں نوازشریف نہیں کہ پاکستان سے بھاگ جائوں۔نوازشریف انتظارکررہا ہے کہ اس کو طاقتور لوگوں سے این آر او مل جائے اورپھر وہ واپس آجائے۔ہم سب مل کرنوازشریف کا استقبال کریں گے۔ان کو ایئرپورٹ سے اڈیالہ جیل لے کرجائیں گے۔

عمران خان کا کہنا تھاکہ نوازشریف نے میڈیکل رپورٹس میں بھی دھاندلی کی، نوازشریف اور زرداری مل کرسازش کررہے ہیں۔نواز شریف جب بھی واپس آئو اور الیکشن لڑو، چیلنج کرتا ہوں تمہارے حلقے میں جاکر تمہیں ہرائوں گا۔

عمران خان کا کہنا تھا کہ قوم اگر آزاد نہیں ہوتی تو اس کی عزت نہیں ہوتی اور پرواز کے لیے اللہ نے انسان کو پر دیئے ہیں۔عدالتیں عوام کے بنیادی حقوق کی حفاظت کرتی ہیں لیکن عام آدمی کچہری میں رلتا ہے اور اس کی شنوائی نہیں ہوتی۔ عام آدمی کے بنیادی حقوق نہیں ہوتے کیونکہ وہ غلام ہوتے ہیں۔ حکومت کو اسکرپٹ باہر سے ملتا ہے اور حکومت کو اسکرپٹ دیا جاتا ہے کہ روس سے سستا تیل نہیں لینا۔

عمران خان نے کہا کہ ارشد شریف کو ملک چھوڑنا پڑا اور اسے شہید کر دیا گیا۔ مجھ پر درجنوں مقدما ت درج کیے گئے اور چیف الیکشن کمشنر کے خلاف تو میں ہرجانے کے لیے عدالت جاؤں گا۔

عمران خان نے دعویٰ کیا کہ نواز شریف کو ان کے حلقے میں ہرا دوں گا اور آصف زرداری کے پیچھے سندھ آ رہا ہوں۔ میں نواز شریف نہیں کہ ملک سے فرار ہو جاؤں جبکہ نواز شریف نے میڈیکل رپورٹس میں بھی دھاندلی کی اور باہر گئے لیکن میرا جینا مرنا پاکستان میں ہے۔

چیئرمین پی ٹی آئی نے کہا کہ لندن میں بھگوڑا نواز شریف اور آصف زرداری مل کر سازش کر رہے ہیں۔ آصف زرداری کا ولایتی بیٹا تو اردو انگریزی کی طرح بولتا ہے۔