بھارت جنوبی ایشیا میں دہشتگرد گروہوں کا کفیل اور مالی معاون ہے،ترجمان دفتر خارجہ

اسلام آباد : پاکستان نے بھارتی وزارت خارجہ کے بیان کو مسترد کردیا۔ ترجمان دفترخارجہ کہتی ہیں کہ بھارتی وزارت خارجہ کا بیان بھارت کی بڑھتی ہوئی مایوسی کا بھی عکاس ہے۔ بھارت جنوبی ایشیا میں دہشت گرد گروہوں کا کفیل اور مالی معاون ہے،بھارتی دہشتگردی پر جاری ڈوزیئر میں ناقابل تردید ثبوت موجود ہیں۔

بھارتی وزارت خارجہ کے بیان پر ترجمان دفتر خارجہ نے ردعمل میں کہا ہے کہ اپنے بیان کے ساتھ، بھارت نے 2002 کے گجرات قتل عام کی حقیقتوں سے چھپنے کی کوشش کی ہے، یہ بڑے پیمانے پر قتل، عصمت دری اور لوٹ مار کی شرمناک کہانی ہے،حقیقت یہ ہے کہ گجرات قتل عام کے ماسٹر مائنڈ انصاف سے بچ گئے ہیں، ترجمان دفتر خارجہ نے کہا کہ گجرات قتل عام کے ماسٹر مائنڈ اب بھارت میں اہم سرکاری عہدوں پر فائز ہیں، بھارت میں ہندوتوا کے جرائم کو کوئی بھی لفظ چھپا نہیں سکتا، حکمران جماعت کے سیاسی نظریے ہندوتوا نے نفرت، تفرقہ بازی کے ماحول کو جنم دیا ہے۔ سمجھوتہ ایکسپریس حملے کے ماسٹر مائنڈ اور مجرموں کی بریت انصاف کے قتل عام کو ظاہر کرتی ہے،سمجھوتہ ایکسپریس حملے میں بھارتی سرزمین پر 40 پاکستانی شہری ہلاک ہوئے تھے،مذہبی اقلیتوں کو دھمکانے اور شیطانیت کو بھارت بھر کی ریاستوں میں سرکاری سرپرستی حاصل ہے،ترجمان دفتر خارجہ کا کہنا تھا کہ ہندوتوا کو گائے کی حفاظت، عبادت گاہوں کی توڑ پھوڑ اور مذہبی اجتماعات پر حملہ کرنے کے لیے اتار دیا گیا ہے، بھارت غیر قانونی طور پر مقبوضہ جموں و کشمیر میں جبر کا مرتکب ہے، بھارت جنوبی ایشیا میں دہشتگرد گروہوں کا کفیل اور مالی معاون ہے،بھارتی دہشت گردی پر جاری ڈوزیئر میں موجود ثبوت دہشت گردانہ حملے میں بھارت کے ملوث ہونے کی تصدیق کرتے ہیں، شواہد اس بات کی تصدیق کرتے ہیں کہ لاہور حملے کو بھارتی ریاست نے اکسایا، منصوبہ بندی کی اور اس کی مالی معاونت کی، بھارت پاکستان کو بدنام کرنے کے ایجنڈے کو آگے بڑھانے کے لیے بین الاقوامی پلیٹ فارمز کو شدت سے استعمال کر رہا ہے۔