جاپان، اٹلی اور اسپین کے قرضوں کی ادائیگی موخر،معاہدے رواں ماہ طے پا جائیں گے

اسلام آباد : آئی ایم ایف کیساتھ معاہدے کے بعد پاکستان معیشت کے لیے ایک اور اچھی خبر، جاپان، اٹلی اور اسپین کیساتھ بھی قرضوں کی ادائیگی موخر کرنے کے لیے معاہدے تیار کرلیے گئے،معاہدے رواں ماہ طے پا جائیں گے۔
جی ٹوئنٹی ممالک سے قرض موخر اقدامات کے تحت ان تین ممالک سے 6 معاہدوں میں 18 کروڑ 95 لاکھ ڈالر کا قرض موخر کرایا جائے گا، جاپان سے 2 کروڑ 60 لاکھ ڈالر قرض موخر کرنے کا ایک اور معاہدہ بھی کیا جائے گا۔جاپان سے تین معاہدوں میں مجموعی طور پر 18 کروڑ ڈالر سے زائد ،اسپین سے 31 لاکھ اور اٹلی سے 11 لاکھ ڈالر قرض موخر کرایا جائے گا۔

اقتصادی امور ڈویژن ذرائع کے مطابق جی ٹوئنٹی ممالک سے تیسرے سیشن میں اب تک 94 کروڑ 70 لاکھ ڈالر کے قرض موخر ہو چکے ہیں ،تین ممالک سے معاہدوں کے بعد یہ رقم 1 ارب 13 کروڑ ڈالر سے زائد ہو جائے گی۔