جسٹس قاضی فائز عیسیٰ کا جوڈیشل کمیشن اجلاس بلانے پر تحفظات کا اظہار

اسلام آباد : سندھ ہائیکورٹ اور لاہور ہائیکورٹ میں ججز تقرری کے معاملے پر جسٹس قاضی فائز عیسیٰ نے جوڈیشل کمیشن اجلاس بلانے پر تحفظات کا اظہار کرتے ہوئے چیف جسٹس پاکستان کو تحفظات سے آگاہ کردیا ہے

جسٹس قاضی فائز عیسی کا کہنا ہے کہ نہ تو مجھے چیف جسٹس پاکستان نہ ہی رجسٹرار سپریم کورٹ نے اجلاسوں سے متعلق آگاہ کیا ہے۔گرمیوں کی تعطیلات کے دوران جوڈیشل کمیشن اجلاس بلانے کی وجہ سمجھ سے بالاتر ہے۔ جوڈیشل کمیشن اجلاسوں کو موخر کیا جائے۔ جسٹس قاضی فائز عیسی نے کہا کہ سندھ اور لاہور ہائیکورٹس میں بھی موسم گرما کی تعطیلات چل رہی ہیں۔ غیر قانونی طریقے سے جوڈیشل کمیشن اجلاس نہیں بلایا جاسکتا۔ ہم سب کو آئینی ذمہ داری سے آگاہ ہونا چاہیے۔ عوام کی تقدیر سے غیر آئینی طریقے سے نہ کھیلا جائے،جسٹس قاضی فائز عیسیٰ  نے کہا کہ غیر قانونی طور پر جوڈیشل کمیشن اجلاس بلانا بھی ہے تو ویڈیو لنک کی سہولت دی جائے۔ سندھ ہائیکورٹ میں بطور وکیل پریکٹس والا جوڈیشل کمیشن کا واحد ممبر ہوں۔ جوڈیشل کمیشن کے سینئر ممبر کو اجلاس سے آگاہ نہ کرنا کیا اسکی توہین نہیں۔سندھ ہائیکورٹ میں چھ ایڈیشنل ججز کی تقرری سے متعلق جوڈیشل کمیشن اجلاس کل ہوگا۔ لاہور ہائیکورٹ میں 13 ایڈیشنل ججز کی مستقلی سے متعلق جوڈیشل کمیشن اجلاس 29 جون کو ہوگا