کورونا کی نئی لہر۔۔ اسلام آباد میں 88 نئے کیسز کے بعد مائیکرو لاک ڈاؤن کا فیصلہ

وفاقی دارالحکومت اور جڑواں شہر راولپنڈی سمیت ملک بھر میں کورونا کی نئی لہر نے خطرے کی گھنٹی بجا دی ہے، اسلام آباد میں ایک دن میں 88 نئے کورونا کیسز رپورٹ ہونے کے بعد کئی علاقوں میں مائیکرو لاک ڈاون نافذ کرنے کا فیصلہ کر لیا گیا۔

ڈسٹرکٹ ہیلتھ آفسر اسلام آباد کے جاری مراسلے میں کہا گیاہے کہ نئے کورونا کیسز رپورٹ ہونے پر سیکٹر جی 10/4 گلی نمبر 38،44،45،46،47 اور 48 کو سیل کر دیا جائے۔ سیکٹر آئی 8/2 کی گلی نمبر 25، 29 اور سیکٹر جی 10/4 کی 85 اور 89 نمبرگلیاں بھی سیل کی جائیں۔

متاثرہ علاقوں سے کورونا ٹیسٹ کے لیے نمونے بھی حاصل کیے جا رہے ہیں۔ حکام کا کہنا ہے کہ بروقت لاک ڈاون سے کورونا کیسز کے پھیلاو میں کمی لائی جا سکتی ہے۔محکمہ صحت کے مراسلے کے بعد ضلعی انتظامیہ نے کہاکہ اتوار صبح سے ان علاقوں میں مائیکرو لاک ڈاون نافذ کر دیا جائے ۔ شہری مناسب مقدار میں کھانے پینے کے سامان اور دیگر اشیاء کا بندوبست کرلیں۔

دوسری جانب وفاقی دارالحکومت کے جڑواں شہر راولپنڈی میں انسداد کورونا ایس او پیز کی خلاف ورزیوں پر دو شادی ہال سیل کر کے 95 ہزار روپے جرمانہ کیا گیاہے، ضلعی انتظامیہ نے کئی مقامات پر سخت وارننگز بھی جاری کیں۔