جعلی بینک اکاؤنٹ کیس: نیب کی ابتدائی رپورٹ ہیڈ کوارٹرزکوموصول

اسلام آباد: جعلی بینک اکاؤنٹس کے ذریعے منی لانڈرنگ سے متعلق کیس میں نیب راولپنڈی کی پہلی ابتدائی رپورٹ ہیڈ کوارٹرز کو موصول ہو گئی ہے۔ قومی احتساب بیورو کی جانب سے یہ رپورٹ پیر کو سپریم کورٹ میں جمع کرائی جائے گی۔

سابق صدر آصف علی زرداری ان کی ہمشیرہ فریال تالپور، اومنی گروپ کے عہدیداران کیخلاف کیس میں تحقیقاتی رپورٹ ڈی جی نیب راولپنڈی عرفان نعیم منگی نے تیار کی ہے۔

ذرائع کے مطابق رپورٹ میں کہا گیا ہے کہ جعلی بینک اکاونٹس کیس کی تحقیقات کیلئے مشترکہ تفتیش کار ٹیم بنادی ہے، نیب نے 16 مقدمات کی چھان بین شروع کی ہے، جو میرٹ پر جاری ہے۔ مقدمات سے متعلق مزید ثبوت حاصل کیے جا رہے ہیں، متلعقہ محکموں سے مزید ریکارڈ بھی طلب کیا گیا ہے۔

واضح رہے کہ سپریم کورٹ نے قومی احتساب بیورو کو ہر 15 روز بعد مقدمے میں پیشرفت رپورٹ جمع کرانے کا حکم دیا تھا۔