وزیراعظم نے نوجوانوں کے روزگار کیلئے نیشنل جاب پورٹل کے قیام کی منظوری دیدی

 پاکستانی نوجوانوں کے لیے بڑی خبر۔۔۔ وزیراعظم عمران خان نے نوجوانوں کے روزگار کے لیے نیشنل جاب پورٹل کے قیام کی منظوری دے دی ہے۔ پورٹل سے نوجوانوں کو ملک بھر میں ملازمتوں کے مواقع میسر ہوں گے۔

وزیراعظم عمران خان سے ان کے معاون خصوصی برائے امور نوجوانان عثمان ڈار نے اسلام آباد میں ملاقات کی، جس میں معاون خصوصی نے کامیاب جوان پروگرام کے حوالے سے وزیراعظم کو بریفنگ دی ہے، وزیراعظم کو کامیاب جوان پروگرام میں قرضوں کی فراہمی سے متعلق پیش رفت اور نیشنل جاب پورٹل سے متعلق تفصیلی آگاہ کیا۔

ملاقات میں ٹائیگر فورس کے حوالے سے مختلف امور پر بھی مشاورت کی گئی۔ کورونا کی بڑھتی صورتحال  کے پیش نظر ٹائیگر فورس کو دوبارہ زمہ داریاں دینے کا فیصلہ کرتے ہوئے وزیراعظم عمران خان نے کہا کہ نوجوان ملک کا قیمتی اثاثہ ہیں۔نوجوانوں کو با اختیار بناناپی ٹی آئی حکومت کی اولین ترجیح ہے۔

معاون خصوصی عثمان ڈار کا کہنا تھا کہ وزیراعظم کے وژن کے مطابق نوجوانوں کے باعزت روزگار کے لیے کوشاں ہیں، پورٹل سے نوجوانوں کو ملک بھر میں ملازمتوں کے مواقع میسر ہوں گے۔