پارک ویوہائوسنگ سوسائٹی کا این او سی بحال،سی ڈی اے سے رپورٹ طلب

اسلام آباد :سپریم کورٹ نے نجی ہائوسنگ سوسائٹی پارک ویو کا این او سی منسوخی کا فیصلہ معطل کرتے ہوئے این اوسی بحال کردیا۔

عدالت نے پارک ویو سٹی انتظامیہ کیخلاف اندراج مقدمہ کا فیصلہ بھی معطل کرتے ہوئے معاملہ چیئرمین سی ڈی اے کو بھجوا دیا۔دوران سماعت چیف جسٹس نے ریمارکس دیئے کہ سی ڈی اے متاثرین کو معاوضہ کیوں نہیں ادا کر رہا؟۔سی ڈی اے کے اربوں روپے اسلام آباد کی سڑکوں پر لگ رہے ہیں۔اتنی چوڑی سڑکیں ہیں کہ اسلام آباد میں جہاز بھی لینڈ کر سکتا ہے۔

عدالت نے چیئرمین سی ڈی اے کو حکم دیا کہ زمینی حقائق کا جائزہ لیکر رپورٹ پیش کریں۔چیف جسٹس نے کہا کہ اسلام آباد کے 1960 کے متاثرین کو بھی ادائیگی نہیں ہو رہی۔جسٹس عائشہ ملک کا کہنا تھا کہ متاثرین نے تو سول کیس بھی دائرکررکھا ہے۔سول کیس کرنے والے ہائیکورٹ میں آئینی درخواست کیسے دے سکتے ہیں؟۔چیف جسٹس کا کہنا تھا کہ عوامی مفاد میں کارروائی کرنا سوموٹو ہے جو ہائیکورٹ کا اختیار نہیں۔عدالت نے مزید سماعت ایک ماہ بعد تک ملتوی کردی۔