پاکستان ذمہ دار ایٹمی ملک ہے، کور کمانڈرز کا ایٹمی کمانڈ کنٹرول اسٹرکچر پر مکمل اعتماد کا اظہار

راولپنڈی : آرمی چیف جنرل قمر جاوید باجوہ کی زیر صدارت کورکمانڈرز کانفرنس ہوئی۔ کورکمانڈرز نے کہا کہ پاکستان جوہری ہتھیاروں کی حامل ایک ذمہ دار ریاست ہے اور اس پر کوئی سمجھوتہ نہیں کیا جائے گا، پاکستان نے جوہری سلامتی کے نظام کو موثر بنانے کے لیے تمام ضروری اقدامات کر رکھے ہیں۔

آئی ایس پی آر اعلامیہ کے مطابق اجلاس میں داخلی اور بیرونی سلامتی کی صورتحال اور فوج کی آپریشنل تیاریوں کا جائزہ لیا گیا۔شرکاء نے پاکستان کے مضبوط جوہری کمانڈ اینڈ کنٹرول سسٹم اور اسٹریٹجک اثاثوں کی سلامتی پر مکمل اعتماد کا اظہار کیا اور کہا کہ پاکستان جوہری ہتھیاروں کی حامل ایک ذمہ دار ایٹمی طاقت ہے،پاکستان نے اپنے جوہری سلامتی کے نظام کو موثر بنانے کے لیے تمام ضروری اقدامات کر رکھے ہیں۔پاکستان کے جوہری سلامتی کے معیارات بین الاقوامی طریقہ کار پر مبنی ہیں۔

فورم کو سیلاب سے متاثرہ علاقوں بالخصوص سندھ اور بلوچستان کی صورتحال سے بھی آگاہ کیا گیا جبکہ آرمی چیف نے فارمیشنر کی سیلاب کے دوران امدادی سرگرمیوں میں کردار کو بھی سراہا۔