پاکستان ریلوے اور پی آئی اے کا کرایوں میں رعایت کا اعلان

اسلام آباد : پاکستان ریلویز کی اکانومی کلاس اور پی آئی اے کی اندرون ملک تمام پروازوں پر کرایوں میں 10 فی صد رعایت کا اعلان کیا ہے۔

وفاقی وزیر ریلوے اور ہوابازی خواجہ سعد رفیق نے اپنے ویڈیو پیغام میں کہا ہے کہ  آج رات بارہ بجے کے بعد کرایوں میں رعایت پر عملدرآمد شروع ہو جائے گا۔ پاکستان ریلویز اور پی آئی اے نے یہ فائدہ اپنے مسافروں تک منتقل کرنے کا فیصلہ کیا ہے۔

خواجہ سعد رفیق نے کہا کہ پاکستان ریلویز کی ایکسپریس ٹرینوں کی اکانومی کلاس کے کرایوں میں 10 فیصد کمی کی جا رہی ہے جبکہ پی آئی اے کی اندرون ملک پروازوں کی دونوں کلاسز کے کرایوں میں بھی 10 فیصد رعایت دی جا رہی ہے۔ فیصلوں کا اطلاق ان شاء اللہ 17 جولائی سے اگلے 30 روز کے لیے ہوگا۔ کرایوں میں کمی کا نوٹیفکیشن کل جاری کیا جائے گا۔

واضح رہے کہ ریلوے میں 94 فیصد جبکہ پی آئی اے میں 90 فیصد سے زائد مسافر اکانومی کلاس میں سفر کرتے ہیں۔