پاکستان آئی ایم ایف کے ساتھ کیے وعدوں پر قائم رہے گا ، صدر سے وزیرخزانہ کی ملاقات

اسلام آباد :  صدر مملکت عارف علوی نے کہا ہے کہ ریاست پاکستان حکومت کی جانب سے آئی ایم ایف کے ساتھ کیے گئے وعدوں پر قائم رہے گی۔

ایوان صدر کی جانب سے جاری اعلامیہ کے مطابق صدر مملکت ڈاکٹر عارف علوی سے وزیر خزانہ سینیٹر اسحاق ڈار کی ملاقات ہوئی ہے جس میں وزیر خزانہ نے صدر مملکت کو آئی ایم ایف کے ساتھ مذاکرات میں ہونے والی پیش رفت اور اتفاق رائےکے بارے میں آگاہ کیا ہے، صدر مملکت نے آئی ایم ایف کے ساتھ معاہدے پر مذاکرات کیلئے حکومتی کوششوں کو سراہا ۔

اس موقع پر صدر مملکت عارف علوی نے کہا کہ ریاست پاکستان حکومت کی جانب سے آئی ایم ایف کے ساتھ کیے گئے وعدوں پر قائم رہے گی۔ اسحاق ڈار نے کہا کہ حکومت ایک آرڈیننس جاری کرکے ٹیکسوں کے ذریعے اضافی ریونیو اکٹھا کرنا چاہتی ہے،جس پرعارف علوی کا کہنا تھا کہ اس اہم موضوع پر پارلیمنٹ کو اعتماد میں لینا زیادہ مناسب ہوگا، پارلیمنٹ کا سیشن فوری طور پر بلایا جائے تاکہ بل کو بلاتاخیر قانون بنایاجاسکے۔