پی ٹی آئی کا قومی اسمبلی میں اپوزیشن لیڈر کوتبدیل کرنے کا مطالبہ

اسلام آباد : پاکستان تحریک انصاف نے قومی اسمبلی میں اپوزیشن لیڈر کو تبدیل کرنے کا مطالبہ کردیا ہے ۔

سابق وزیر اطلاعات و نشریات فواد چودھری نے لاہور ہائیکورٹ کی جانب سے پی ٹی آئی کے 43 ارکان اسمبلی کو ڈی نوٹیفائی کرنے کے فیصلے پر حکم کے بعد رد عمل دیتے ہوئے کہا ہے کہ سپیکر تھوڑا سا جمہوریت کا پاس رکھیں اور اپوزیشن لیڈر تبدیل کرنےکا نوٹیفکیشن جاری کریں، ہربات کیلئے عدالت جانا کوئی اچھی پارلیمانی روایت نہیں۔

پاکستان تحریک انصاف کے رہنما اسد عمر نے بھی لاہور ہائی کورٹ کی جانب سے الیکشن کمیشن کے حکم کو معطل کرنے پر ردعمل دیتے ہوئے کہا کہ عدالت نے سپیکر کا سیاسی بنیاد پر کیا گیا فیصلہ معطل کر دیا۔

اپنے ٹویٹر پیغام میں سابق وزیرخزانہ اسد عمر نے کہا کہ تحریک انصاف کے 43 ایم این اے کی رکنیت بحال ہو گئی ہے ، راجہ ریاض صاحب لیڈر آف اپوزیشن کا کمرہ خالی کرنے کی تیاری کریں۔

لاہور ہائیکورٹ نے پاکستان تحریک انصاف کے ممبران قومی اسمبلی کے استعفے منظور کرنے کا حکم معطل کردیا اور 43 حلقوں میں ضمنی الیکشن تاحکم ثانی روک دیا۔