ریسکیو1122کے3235 ملازمین مستقل، ریٹائرمنٹ کی عمر50 سال کرنے کی منظوری

پنجاب حکومت نے ریسکیو 1122 کے ملازمین کی ریٹائرمنٹ کی عمر 45 سال سے بڑھا کر 50 برس کرنے، 3 ہزار 235 افسران اور اہلکاروں کو ریگولر کرنے اور دوران تربیت قواعد وضوابط کے تحت تنخواہ اور دیگر مراعات ادائیگی کی منظوری دے دی۔
وزیراعلیٰ پنجاب سردار عثمان بزدار کے زیرصدارت پنجاب ایمرجنسی کونسل کا اہم اجلاس لاہور میں ہوا جس میں ریسکیو 1122 کی خدمات کو مزید بہتر بنانے کے لئے کئی اقدامات کی منظوری دی گئی۔ اجلاس میں ریسکیو 1122 کے ملازمین کی ریٹائرمنٹ کی عمر 45 سال سے بڑھا کر 50 برس کرنے، 3 ہزار 235 افسران اور اہلکاروں کو ریگولر کرنے اور دوران تربیت قواعد وضوابط کے تحت تنخواہ اور دیگر مراعات ادائیگی کی منظوری دی گئی۔

اجلاس سے خطاب کرتے ہوئے وزیراعلیٰ پنجاب سردار عثمان بزدار نے ہدایات کہ کہ بلند عمارتوں، پلازوں اور شاپنگ مالز میں ایمرجنسی اخراج کے راستے ہر صورت رکھے جائیں، انہوں نے صوبے بھر بالخصوص لاہور میں عمارتوں کے تفصیلی معائنے انسپکشن کرکے رپورٹ پیش کرنے کی ہدایت کی اور کہا کہ عمارتوں کے قریب ہائیڈرنٹس لگانے کے عمل کو یقینی بنایا جائے۔

سردار عثمان بزدار کا کہنا تھا کہ ہائیڈرنٹس سے آتشزدگی کی صورت میں فائر بریگیڈ گاڑیوں کو پانی کیلئے دور نہیں جانا پڑے گا۔ اس کے علاوہ عمارتوں میں آگ سے بچاؤ کے لئے آلات کی تنصیب یقینی بنائی جائے، انہوں نے موٹر بائیک ایمبولینس سروس کا دائرہ کار پنجاب کے ہر ضلع تک لے کر جانے کا اعلان کیا اور کہا کہ ہر ضلع کو ایمبولینس سروس کیلئے 50 موٹر سائیکلیں دی جائیں گی۔

وزیراعلیٰ پنجاب کا کہنا تھا کہ حکومت عوام کو صحت کی بہترین سہولیات پہچانے کے لئے پرعزم ہے اور اس مقصد کے لئے  250 نئی ایمبولینسیں بھی خریدی جا رہی ہیں۔ ریسکیو 1122 کے ادارے کو غیر روایتی انداز سے چلایا جائے گا۔ انہوں نے ریسکیو 1122 کے افسروں اور عملے کی ترقی کے امور کو جلد حل کیا جائے۔