اسلام آباد کے بہارہ کہو بائی پاس منصوبے پرایک ہفتے کے دوران دوسرا بڑا حادثہ

اسلام آباد کے بہارہ کہو بائی پاس منصوبے پرایک ہفتے کے دوران دوسرا بڑا حادثہ پیش آیا ہے جس کے باعث زیر تعمیر پل کے گارڈرز گر گئے ہیں۔ کوئی جانی نقصان نہیں ہوا۔سی ڈی اے نے تحقیقات شروع کردیں۔ پچیس فروری کو اسی زیرتعمیرپل کی شٹرنگ گرنے سے دو مزدور جاں بحق جبکہ تین زخمی ہوئے تھے۔

پل کے گارڈرز گرنے کی اطلاع ملتے ہی چیئرمین سی ڈی اے نورالامین مینگل اور امدادی ٹیمیں موقع پرپہنچ گئیں۔پولیس کی بھاری نفری بھی تعینات کردی گئی۔زیر تعمیر پل کی سائڈ کو عوام اور ٹریفک کے لیے بند کر دیا گیا۔

سی ڈی اے ترجمان کا کہنا ہے کہ 5 گرڈرز دو روز قبل رکھے گئے۔آخری گارڈر رکھنے کے دوران گر گیا۔۔تحقیقات جاری ہیں۔چیئرمین سی ڈی اے نے کہا ہے کہ کرین سلپ ہونے سے حادثہ پیش آیا۔ منصوبے کی تکمیل کےلئے کسی قسم کی جلد بازی نہیں کی جارہی۔