سندھ کابینہ کی3687 روپے میں 100 کلوگرام گندم ریلیزکی منظوری، آٹا9 روپے سستا ہونے کا امکان

کراچی: سندھ کابینہ نے 16 اکتوبر سے سرکاری گندم کا 100 کلوگرام کا تھیلا 3ہزار 687 روپے میں ریلیز کرنے کی منظوری دے دی جس سے آٹے کی قیمت 9.13 روپے فی کلو تک کم ہوجائے گی۔

کراچی: سندھ کابینہ نے تفصیلی غور و خوض کے بعد گندم کی قیمت 3687.50 روپے فی 100 کلو بیگ مقرر کرنے کی منظوری دیدی اس طرح ایکس مل آٹا کی قیمت میں 9.13 روپے فی کلوگرام کمی ہو سکے وزیراعلیٰ سندھ سید مراد علی شاہ کی زیرصدارت صوبائی کابینہ کا اجلاس وزیراعلیٰ ہاؤس کراچی میں منعقد ہوا۔ جس میں سکریٹری فوڈ نے کہا کہ اس وقت صوبے کی چھ ڈویژنوں میں 1.262 ایم ایم ٹی گندم کا ذخیرہ موجود ہے۔ مارکیٹ میں آٹے  کی قیمتیں مستحکم تھیں جو فی کلو 57 روپے ریکارڈ کی گئی۔

وزیراعلیٰ سندھ نے کہا کہ آٹے کی قیمت کم کرنا ہوگی کیونکہ گندم مارکیٹ میں دستیاب ہے لہٰذا قیمتوں میں کمی آنی چاہئے۔ وزیر خوراک ہری رام کی سفارش پر فلور ملز کو 16 اکتوبر سے گندم جاری کرنے کی منظوری دی گئی۔

گندم کی قیمت باردانہ کے ساتھ 3 ہزار 687.50 روپے فی 100 کلوگرام کی منظور دی گئی۔ گندم کی نئی ایشو پرائس کے ساتھ ہی آٹے کی قیمتیں 9.13 روپے کم ہوجائیں گی اور آٹے کی نئی قیمت 47.87 روپے فی کلوگرام پر آجائے گی۔ وزیراعلیٰ سندھ نے محکمہ خوراک کو ہدایت کی کہ وہ ایکس مل کی سطح پر آٹے کی قیمت میں کمی کو یقینی بنائے اور ضلعی انتظامیہ کو آگاہ کرتے رہیں تاکہ وہ خوردہ سطح پر قیمتوں پر قابو پاسکیں۔

صوبائی کابینہ کے اجلاس میں اراکین  نے ایک بار پھر وفاقی حکومت سے آئی لینڈ اتھارٹی کے قیام کے متنازعہ آرڈیننس کو واپس لینے کا مطالبہ کرتے ہوئے کہا کہ جب تک متنازعہ آرڈیننس واپس نہیں لیا جاتا ہے تب تک وفاقی حکومت سے جزائر کے معاملہ پر کوئی بات چیت نہیں کی جائے گی۔ کابینہ نے اس آرڈیننس کو مقامی ماہی گیروں کے حقوق پامال کرتے ہوئے صوبائی سرکاری اراضی پر قبضہ کرنے کی کوشش  قرار دیا۔ کابینہ کے اراکین نے متفقہ طور پر کہا ہم اس آرڈیننس کو قبول نہیں کریں گے کیونکہ یہ صوبائی خودمختاری اور مقامی لوگوں کے مفاد کے خلاف ہے۔

سندھ کابینہ نے ای سی سی کے 30 سالہ مراعاتی پیکیج کے مطابق درآمدات پر انفراسٹرکچر ڈویلپمنٹ سیس (آئی ڈی سی) کو 30 سال کی مدت کے لئے چھوٹ دینے کی منظوری دے دی۔ دیگر صوبوں کے ساتھ یکسانیت برقرار رکھنے کے لئے پٹرولیم آئلز کی ٹرانسپورٹیشن یا  آئل ٹینکرز کے ذریعے لے جانے پر خدمات پر سندھ سیلز ٹیکس کو 13 سے 15 فیصد تک کردیا ہے۔ اس سے صارفین پر کوئی بوجھ نہیں پڑے گا اور نہ ہی پٹرولیم قیمتوں پر کوئی اثر پڑے گا۔

صوبائی کابینہ نے ’’آئی بی اے سکھر یونیورسٹی سکھر (ترمیمی) ایکٹ  2020‘‘ کے مسودے کے بل کی منظوری دی کہ قانون میں متعدد ترامیم کی جائیں تاکہ تنظیم، مینجمنٹ میں یکسانیت برقرار رہے اور سرکاری شعبوں کی یونیورسٹیوں کے انتظام و کنٹرول اور ڈگری ایوارڈ دینے والے اداروں میں۔  منظور شدہ ترامیم کو اسمبلی کو ریفر کیا گیا۔