اتنا بڑا بحران کبھی نہیں آیا،تاریخ کے سب سے کم ذخائر رہ گئے، عمران خان

لاہور : پاکستان تحریک انصاف کے چیئرمین عمران خان نے کہا ہے کہ ہمارے پاس ملکی تاریخ کے سب سے کم ذخائر رہ گئے۔ویڈیو خطاب میں انہوں نے کہا کہ اس ملک کی تاریخ میں اتنا بڑا بحران کبھی نہیں آیا جو آج ہے۔کوئی پیسے دینے کے لیے بھی تیار نہیں۔ ایک شخص نے رجیم چینج کرنے کا فیصلہ کیا۔یہ لوگ 30 سال سے اقتدار میں ہیں اور ان 2 خاندانوں کی دولت میں مسلسل اضافہ ہوتا گیا۔ یہ جو اقتدار میں بیٹھے ہوئے ہیں سب فیل ہو گئے جبکہ بنگلہ دیش بھی پاکستان سے آگے نکل گیا ہے۔

سابق وزیراعظم نے کہا کہ 90 کی دہائی میں پاکستان کے تمام اعشاریئے مثبت تھے لیکن آج پاکستان میں سری لنکا جیسی صورتحال ہے اور پاکستان کے زرمبادلہ تاریخ کی کم ترین سطح پر ہیں۔ کوئی بھی ملک اور ادارہ پاکستان کو ادھار دینے کے لیے تیار نہیں۔عالمی مالیاتی ادارے آئی ایم ایف کی شرائط مانیں گے تو مہنگائی میں اور اضافہ ہو گا اور آئی ایم ایف کی شرائط ماننے سے روپے کی قدر میں مزید کمی آئے گی۔ آج ہمارے پاس ایل سیز کھولنے کے پیسے نہیں ہیں۔ ملک میں قانون کی بالادستی ضروری ہے اور قانون پر عمل درآمد ہو گا تو ملک موجود حالات سے نکلے گا۔

چیئرمین پی ٹی آئی نے کہا کہ پاکستان کا سب سے بڑا مسئلہ رول آف لا ہے اور ملک میں فیکٹریاں بند ہو رہی ہیں۔پاکستان دلدل میں پھنسا ہوا ہے جسے وکلا نکال سکتے ہیں۔ نامور ڈاکوؤں کو اقتدار میں بیٹھا دیا گیا ہے اور پی ڈی ایم نے اقتدار میں آکر این آر او لیا جبکہ رول آف لا ہے کہ کسی کو این آر او نہ دینا۔ کسی بھی ترقی یافتہ ملک میں یہ نہیں ہوتا کہ کوئی چوری کرے اور اسے معافی مل جائے۔ اوورسیز پاکستانیوں نے ہمیشہ مشکل وقت میں ملک کی مدد کی۔ہماری حکومت میں 17 سال بعد ملک ترقی کر رہا تھا اور ملک میں انڈسٹریز چل رہی تھی جبکہ ٹیکس بھی ریکارڈ جمع ہوا۔ جب تک برآمدات نہیں بڑھیں گی ملک ایسے ہی بحران کا شکار ہو گا جبکہ ہم نے ملک میں سرمایہ کاری کو بڑھانا ہے۔

عمران خان نے کہا کہ حکومت میں آ کر انہوں نے اپنے کیسز معاف کروا دیئے ہیں جبکہ پہلے مشرف اور اب جنرل باجوہ نے انہیں این آر او ٹو دیا۔ جتنے بھی ان کے پرانے کیسز تھے سب ختم کروا دیئے گئے۔ سابق وزیر اعظم اپنے اوپر ہوئے حملے کی ایف آئی آر درج نہیں کروا سکا جبکہ ترقی یافتہ ممالک میں قانون کی حکمرانی ہے اور ترقی یافتہ ممالک اپنے کمزور شہری کو قانون کےذریعے تحفظ فراہم کرتے ہیں۔شہباز شریف نے بھارت کی تعریف کی جو وہ بار بار ٹی وی پر دکھا رہے ہیں اور شہباز شریف کہتا ہے کہ ہمیں بھارت سے دوستی کرنی چاہیے۔ میں 26 سال سے رول آف لا کے لیے جدوجہد کر رہا ہوں۔ ڈیڑھ مہینے پہلے پتہ تھا کہ یہ میرے اوپر حملہ کریں گے۔

چیئرمین پی ٹی آئی کا کہنا تھا پنجاب میں ہماری حکومت ہونے کے باوجود پولیس بات نہیں مان رہی تھی اور جے آئی ٹی اراکین نے عدالت میں جا کر اپنا بیان تبدیل کیا۔ جے آئی ٹی کو سبوثاژ کرنے کی کوشش کی جارہی ہے اور جس طرح جے آئی ٹی پر پریشر ڈالا جارہا مجھے اب یقین ہے کہ حملہ کس نے کروایا۔