عمران خان کے خلاف فوری قانونی کارروائی کرو، نواز کی شہباز کو ہدایت

اسلام آباد : وزیراعظم شہباز شریف اور نواز شریف کے درمیان ٹیلی فونک رابطہ ہوا جس میں نواز شریف نے شہباز شریف کو عمران خان کے پاک فوج سے متعلق بیانات پر فوری قانونی کارروائی کی ہدایت کردی ہے۔

وزیراعظم شہباز شریف اور نواز شریف کے درمیان ٹیلی فونک رابطے میں عمران خان کے پاک فوج سے متعلق بیانات پر تبادلہ خیال کیا گیا۔نواز شریف نے کہا کہ قومی ریاستی دفاعی اداروں کے خلاف یہ شخص نفرت پھیلا رہا ہے، آئی ایس پی آر کے بیان کی بنیاد پر حکومت تمام قانونی تقاضے پورے کرے، یہ شخص فوج اور عوام کو آمنے سامنے لاکر خونی انقلاب کی باتیں کررہا ہے۔ اس موقع پر وزیراعظم کا کہنا تھا کہ عمران خان سکیورٹی رسک بن گیا اس کیخلاف کارروائی کررہے ہیں، دوسری جانب وزیراعظم شہباز شریف نے آج لاہور میں اعلی سطح اجلاس بھی بلا لیاہے۔جس میں وزیر قانون ایاز صادق،خواجہ سعد رفیق سمیت سینیئر رہنما و وزراء شرکت کریں گے،اجلاس میں حکومت عمران خان کے بیانات کی روشنی میں آئندہ کا لائحہ عمل مرتب کرے گی۔