سابق صدر آصف زرداری کیخلاف قومی اسمبلی میں دائر نااہلی کا ریفرنس مسترد

اسلام آباد : سابق صدر آصف زرداری کیخلاف قومی اسمبلی میں دائر نااہلی کا ریفرنس مستردکر دیا گیا۔

اسپیکر  قومی اسمبلی راجہ پرویز اشرف نے سابق صدر آصف علی زرداری کیخلاف دائر نااہلی کا ریفرنس مسترد کیا ہے۔ریفرنس پی ٹی آئی رہنما سید ذوالفقار عباس بخاری المعروف زلفی بخاری کے جانب سے قومی اسمبلی سیکرٹریٹ میں جمع کرایا گیا تھا۔ریفرنس اسپیکر قومی اسمبلی کو گزشتہ دنوں موصول ہوا۔

ریفرنس میں آصف زرداری کو آئین کی آرٹیکل 62 اور 63 کے تحت ممبر قومی اسمبلی کی حیثیت سے نا اہل کرنے کی استدعا کی گئی تھی۔ریفرنس میں نا اہلی کے سوال کا ریفرنس الیکشن کمیشن آف پاکستان کو بھیجے جانے کی بھی درخواست کی گئی تھی۔اسپیکر قومی اسمبلی نے آئین کے آرٹیکل 63 کی شق (2) کے تحت ریفرنس مسترد کرتے  ہوئے فیصلے کی نقل الیکشن کمیشن کو ارسال کر دی ہے۔