حکومت نے بات کرنی ہے توکرے،14 مئی کوانتخابات ہرصورت ہوں گے، فواد چودھری

لاہور : تحریک انصاف کے رہنما فواد چودھری کا کہنا ہے کہ صوبائی اسمبلیوں کے انتخابات پر بات چیت کا وقت گزر گیا اب حکومت کو قومی اسمبلی الیکشن پر بات کرنی ہے تو کرلے۔

سابق وفاقی وزیر اطلات فواد چودھری نے اپنے ایک بیان میں کہا کہ آئینِ پاکستان کیخلاف مل کر نہیں بیٹھ سکتے، نوازشرف اور مریم نواز کا لندن پلان شہباز شریف کو نا اہل کروانا ہے۔

فواد چودھری نے کہا کہ تحریک انصاف مذاکرات کے معاملے پر یکسو ہے، حکومت کی جانب سے مذاکرات پر کوئی سنجیدگی نہیں، مذاکرات صرف آئین اور سپریم کورٹ کی مقرر کردہ حدود میں ہو سکتے ہیں۔پنجاب، خیبرپختونخوا میں انتخابات نہیں ہوتے تویہ آئین کو سبوتاژ کرنے کے مترادف ہیں، مذاکرات آئین سے باہر نہیں ہوسکتے۔

فواد چودھری کا کہنا تھا کہ سپریم کورٹ کے فیصلے کے بعد اسٹیٹ بینک کا ابھی تک فنڈز جاری نہ کرنا حکم عدولی ہے، سپریم کورٹ وزیراعظم اور کابینہ کے خلاف توہین عدالت کی کاروائی شروع کرے، سپریم کورٹ ان کی عدالت کے ہاتھوں نا اہلی کا شوق پورا کرے۔