وزرات مذہبی امور نے وزیراعظم سے کرتارپور یاتریوں کی داخلہ فیس ختم کرنے کی سفارش کردی

اسلام آباد : قومی اسمبلی کی قائمہ کمیٹی برائے مذہبی امور نے وزیراعظم سے کرتار پور آنے والوں کی فیس کم کرنے کی سفارش کی ہے۔

چیئرمین سید عمران احمد شاہ کی زیر صدارت قومی اسمبلی کی قائمہ کمیٹی برائے مذہبی امور کا اجلاس ہوا جس میں زیارات پر زائرین کو میسر سہولیات کے حوالے سے غور کیا گیا۔چیئرمین کمیٹی نے کہا کہ سکھ کرتار پور پر آنے والے لوگ شکوہ کرتے ہیں کہ ان کے پاس ٹائم کم ہوتا ہے۔ سکھ زائرین کا کہنا ہے کہ وہ لوگ اپنی عبادات مکمل نہیں کرسکتے۔

اس موقع پر سکرٹری مذہبی امور نے کمیٹی کو بتایا کہ پاکستان اور بھارت کے ایگریمنٹ میں رات گزارنے کی اجازت نہیں ہے، ہم نے وزیر اعظم آفس کو سفارش کی ہے کہ 20 ڈالر کی فیس ختم کرنی چاہیے،رکن کمیٹی کھیل داس کوہستانی نے کہا کہ میرا خیال ہے فیس مکمل ختم نہیں کرنی چاہیے بے شک کم کرلیں،زائرین کا ٹائم بڑھایا جائے تاکہ عبادت مکمل ہوسکے، سیکرٹری مذہبی امور نے بتایا کہ حج و عمرہ ایکٹ قومی اسمبلی بھیجا ہے لیکن ابھی تک پاس نہیں ہوا۔

کمیٹی نے حج وعمرہ ایکٹ پاس کرنے کے لیے بھی اسپیکر قومی اسمبلی کو سفارش کردی ہے۔چیئرمین کمیٹی نے کرتار پور آنے والوں کی فیس دس ڈالر کرنے کی سفارش کردی۔