عمران خان پرقاتلانہ حملہ 3 افراد نے کرایا،ہٹایا جائے ورنہ احتجاج، اسد عمر

پاکستان تحریک انصاف کے مرکزی جنرل سیکریٹری اسد عمر نے الزام عائد کیا ہے کہ عمران خان پر قاتلانہ حملہ شہباز شریف ،رانا ثنا اللہ اور میجر جنرل فیصل نصیر نے کروایا ہے۔ عمران خان کا مطالبہ ہے کہ ذمہ داران کو عہدوں سے ہٹایا جائے وگرنہ ملک گیر احتجاج ہو گا۔

سابق وفاقی وزیر اسد عمر نے جاری کردہ ویڈیو بیان میں کہا ہے کہ پی ٹی آئی کارکنان انتظار میں ہیں کہ عمران خان جب کال دیں گے تو ملک گیر احتجاج ہوگا۔ میری ابھی ڈاکٹر فیصل سلطان سے تفصیلی بات ہوئی ہے، میں نے ان سے پوچھاعمران خان کو جو زخم آئے ہیں وہ کس نوعیت کے ہیں؟ تو مجھے بتایا گیا کہ عمران خان کی ٹانگ کی نچلی ہڈی میں چھرے لگے ہیں، ران میں بھی ایک گولی لگی ہے، ڈاکٹروں نے ان کا معائنہ کر لیا ہے، سی ٹی اسکین بھی ہو گیا ہے اور طبیعت بہتر ہے۔

اسد عمر نے کہا کہ عمران خان کہتے ہیں ملک کے لیے جان بھی قربان کرسکتا ہوں، سیکیورٹی تھریٹس تھے۔عمران خان کو آگا ہ کیا تھا، انہوں نے کہا کہ ہمیں اللہ پر بھروسہ ہے، وہی حفاظت کرے گا۔میرا دل سے ایمان ہے کہ اللہ تعالیٰ کا عمران خان پر سایہ ہے، اللہ تعالی نے عمران خان سے اس ملک کے لئے بڑے بڑے کام لینے ہیں۔

اس موقع پر میاں اسلم اقبال نے بات کرتے ہوئے کہا کہ ہم ان تینوں افراد کےخلاف ایف آئی آر کرانے جارہے ہیں۔