کسی بھی مہم جوئی کا جواب دینے کے لیے ہمیں تیار رہنا چاہیے، جنرل باجوہ

کراچی: چیف آف آرمی اسٹاف جنرل قمر جاوید باجوہ نے کہا ہے کہ جدید دور کی جنگوں میں ہم عصر چیلنجز سے باہم آگاہی ہی بالادستی کا باعث بن سکتی ہے۔ انہوں نے کہا کہ کسی بھی مہم جوئی کا جواب دینےکے لیے ہمیں تیار رہنا چاہیے۔

آئی ایس پی آر کے مطابق آرمی چیف جنرل قمرجاوید باجوہ نے دورہ کراچی میں آرڈیننس سینٹرملیر میں کرنل کمانڈنٹ کی تقریب میں شرکت کی جہاں انہوں نے میجرجنرل سید شہاب شاہد کو کرنل کمانڈنٹ کے بیج لگائے۔

آرمی چیف جنرل قمر جاوید باجوہ نے آرڈیننس کور کی امن و جنگ میں خدمات کو سراہتے ہوئے کور کی دہشت گردی کے خلاف جنگ میں کردار کی تعریف کی۔ اس موقع پر منعقدہ تقریب میں حاضرسروس اور یٹائرڈ افسران و جوانوں نے شرکت کی

سپہ سالار نے پی اے ایف ایئروار کالج انسٹیٹیوٹ کا بھی دورہ کیا اور بینچ میں ایئروار کورس کے شرک اسے خطاب کیا۔ آرمی چیف نے پاک فضائیہ کی پیشہ ورانہ مہارتوں اور کارکردگی کو سراہتے ہوئے جدید رجحانات سے متعلق افسران کو خود کو آراستہ کرنے پر زور دیا، جدیدرجحانات سے آراستہ کر کے جنگ میں بالادستی حاصل کی جاسکتی ہے۔ کسی بھی مہم جوئی کا جواب دینے کے لیے ہمیں تیار رہنا چاہیے۔

آئی ایس پی آر کے مطابق آرمی چیف نے فوجی فاؤنڈیشن کا بھی دورہ کیا اور اس دوران انہیں مختلف منصوبوں پر بریفنگ دی گئی۔آرمی چیف نے معیاری سروسز فراہم کرنے پر فاؤنڈیشن کی کوششوں کو سراہتے ہوئے فاؤنڈیشن کی قومی خزانے میں بھاری زرمبادلہ کی فراہمی کی بھی تعریف کی۔ آرمی چیف کا کراچی پہنچنے پر کورکمانڈر لیفٹیننٹ جنرل محمد سعید نے استقبال کیا۔