بانی پی ٹی آئی کے خلاف مقدمات بے بنیاد ہیں، انصاف ہوتا ہوا نظر آنا چاہئے: بیرسٹر گوہر

اسلام آباد ہائیکورٹ کے باہر میڈیا سے گفتگو کرتے ہوئے بانی پاکستان تحریک انصاف کے قانونی نمائندے بیرسٹر گوہر علی نے کہا کہ انصاف صرف ہونا نہیں چاہیے بلکہ ہوتا ہوا بھی نظر آنا چاہئے۔ انہوں نے کہا کہ نواز شریف کو ایک کیس میں 70 دن اور دوسرے میں 91 دن بعد ضمانت ملی، مگر بانی پی ٹی آئی کو تاحال ضمانت نہیں دی گئی، جبکہ ان کے خلاف تمام مقدمات بے بنیاد ہیں۔

بیرسٹر گوہر نے بتایا کہ بانی پی ٹی آئی کی سزا معطلی کی درخواست کو کاز لسٹ میں شامل کر لیا گیا ہے، اور یہ کیس 5 جون کو سنا جائے گا۔

اس موقع پر وزیراعلیٰ خیبرپختونخوا علی امین گنڈاپور نے کہا کہ بانی پی ٹی آئی کے خلاف تمام مقدمات جھوٹے اور سیاسی انتقام پر مبنی ہیں۔ انہوں نے کہا کہ ملک میں قانون کو ایک طرف کر کے طاقتور طبقے کے تابع کر دیا گیا ہے اور آئین و قانون کے ساتھ کھلواڑ ہو رہا ہے۔

علی امین نے کہا کہ بانی پی ٹی آئی صرف اپنی ذات کے لیے نہیں بلکہ قوم اور بچوں کے مستقبل کے لیے جنگ لڑ رہے ہیں۔ انہوں نے عدلیہ سے اپیل کی کہ وہ انصاف فراہم کرے اور جلد فیصلے کرے۔ انہوں نے یہ بھی کہا کہ ہم عدلیہ کے ساتھ کھڑے ہیں اور 26ویں آئینی ترمیم کے خلاف تھے اور رہیں گے۔

پریس کانفرنس میں عمران خان کی ہمشیرہ علیمہ خان بھی موجود تھیں۔ انہوں نے کہا کہ ہم عدلیہ کی مجبوریاں سمجھتے ہیں، لیکن ہمیں بتایا جائے کہ بانی پی ٹی آئی نے آخر کیا بگاڑا ہے؟ انہوں نے کہا کہ بانی پی ٹی آئی نے پیغام دیا ہے کہ چاہے عمر بھر جیل میں رکھو، ظلم کے سامنے جھکنے والا نہیں۔

علیمہ خان نے مزید کہا کہ ججز کو پیچھے بیٹھ کر دھمکایا نہ جائے، ہم صرف اللہ سے ڈرتے ہیں۔ انہوں نے کہا کہ دو سال گزر گئے، لیکن یہ بات سمجھ نہیں آئی کہ بانی پی ٹی آئی کا اصل جرم کیا ہے؟ انہوں نے مطالبہ کیا کہ ہمارے ساتھ بیٹھ کر بات کی جائے۔ پریس کانفرنس کے اختتام پر علیمہ خان نے بیرسٹر گوہر سے پوچھا کہ اگر ان کے پاس کوئی خوشخبری ہے تو وہ ضرور شیئر کریں۔