سعودی عرب میں سات ماہ بعد مرحلہ وار عمرہ ادائیگی کا آغاز کر دیا گیا

ریاض: سعودی حکومت نے عمرہ اور زیارت پر عائد پابندی ختم کر دی، جس کے بعد مسجد الحرام میں عمرہ کی ادائیگی کا مرحلہ وار آغاز ہوگیا ہے۔

سعودی عرب نے سات ماہ بعد مرحلہ وار عمرہ کی ادائیگی کی اجازت دی ہے،جو تین مراحل پر مشتمل ہے، شاہی فرمان کے مطابق انسداد کورونا کے حوالے سے ضابطہ کار کے تحت پہلا مرحلہ 4 اکتوبر یعنی آج سے شروع ہو گیا ہے جس میں 6 ہزار سعودی شہری اور سعودی عرب میں مقیم غیر ملکی عمرہ کی سعادت حاصل کر سکیں گے۔

دوسرے مرحلے میں 18 اکتوبر سے روزانہ 15 ہزار فرزندان اسلام کو یومیہ عمرے کی ادائیگی کی اجازت دی جائے گی جب کہ یکم نومبر سے تیسرے مرحلے کے تحت بیرون ملک سے روزانہ 20 ہزار زائرین عمرے کی سعادت کے لیے آسکیں گے جب کہ ساٹھ ہزار لوگوں کو مسجد الحرام میں نماز  ادا کرنے کی اجازت ہوگی۔

خیال رہے کہ کورونا وباء کے باعث رواں سال مارچ میں سعودی حکومت نے عمرہ کی ادائیگی پر پابندی عائد کردی تھی۔ جبک رواں برس غیرملکیوں کے لئے حج کی ادائیگی پر بھی پابندی تھی اور صرف سعودی شہریوں اور وہاں مقیم غیر ملکیوں کو جج کی سعادت نصیب ہوئی۔