عمران خان گرفتار ہوئے تو پارٹی کی قیادت میں سنبھالوں گا، شاہ محمود قریشی

لاہور ہائیکورٹ کے باہر صحافیوں سے گفتگو کرتے ہوئے شاہ محمود قریشی نے کہاہےکہ میرے خلاف ایک بلاجواز مقدمہ بنایا گیا، پریس کانفرنس سے متعلق ایک بوگس کیس ہے جبکہ میں نے پریس کانفرنس میں کارکنوں کو تلقین کی کہ قانون کو ہاتھ میں نہیں لینا، مقدمہ حقائق کے برعکس اور سیاسی بنیادوں پر درج کیا گیا۔ان کا کہنا تھاکہ ہمیں سیاسی سرگرمیوں سے توجہ ہٹانے کے لیے کیسز میں الجھایا جا رہا ہے،

شاہ محمود قریشی نے کہاکہ پنجاب حکومت نے 8 مارچ کو فسطائیت کا مظاہرہ کیا، ظل شاہ کی پوسٹ مارٹم رپورٹ میں تشدد ثابت ہوا اور ہمارے کارکن کی موت پر دنیا نے نوٹس لیا مگر حکومت نے اس کا مقدمہ بھی عمران خان کیخلاف درج کردیا، ایسے ہتھکنڈوں سے آپ تحریک انصاف کو روک نہیں پائیں گے کیونکہ اس سے عوام میں ہماری مقبولیت مزید بڑھ رہی ہے۔

وائس چیئرمین پی ٹی آئی نے کہا کہ مریم صاحبہ کا لب و لہجہ ان پر ججتا نہیں ہے انہوں نے جو طنزیہ گفتگوفرمائی وہ ان پر سجتی نہیں ہے۔انھوں نے واضح کیا کہ پنجاب میں نگران حکومت ہے لیکن یہ دراصل پی ڈی ایم کی ایکسٹنشن ہے۔

 اُن کا مزید کہنا تھا کہ پہلے تو عمران خان کو گرفتار کرنے کی ضرورت نہیں اگر وہ گرفتار ہوجاتے ہیں ہماری پارٹی کا پورا ایک نظام ہے، کل عمران خان نے بیان دیا ہے کہ اگر ان کو گرفتار کیا گیا تو پارٹی کی ذمہ درای میں سنبھالوں گا۔