سپین، مراکش،اور پرتگال 2030 ء فیفا ورلڈ کپ کی میزبانی کریں گے

زیورخ: انٹرنیشنل فیڈریشن آف ایسوسی ایشن فٹ بال (فیفا) نے اعلان کیا ہے کہ مراکش، سپین اور پرتگال کو 2030 ء فیفا ورلڈ کپ کی میزبانی کے لیے چنا گیا ہے، جبکہ یوراگوئے، ارجنٹائن اور پیراگوئے ٹورنامنٹ کی صد سالہ جشن منانے کے لیے افتتاحی میچوں کی میزبانی کریں گے۔

مراکش، پرتگال اور سپین کی مشترکہ بولی اس ٹورنامنٹ کی میزبانی کے لیے واحد امیدوار تھی۔ فیفا نے اگلے سال میزبان ملک کا اعلان کرنا تھا۔ پہلا ورلڈ کپ 1930 ء میں یوراگوئے میں منعقد ہوا اور میزبان ملک نے جیتا تھا۔

سپین کی جانب سے ورلڈ کپ کی میزبانی کے حق کا حصول فیفا کے سابق صدر لوئس روبیلز کو خواتین کے ورلڈ کپ کے دوران جنسی زیادتی کے الزامات کی وجہ سے استعفیٰ دینے کے چند ہفتوں بعد سامنے آیا ہے۔ ورلڈ کپ تین براعظموں اور چھ ممالک میں منعقد ہوگا۔

فیفا نے اپنے بیان میں کہا: ” کونسل نے متفقہ طور پر اس بات پر اتفاق کیا کہ واحد نامزدگی مراکش، پرتگال اور سپین کی مشترکہ بولی ہوگی، یہ وہ ممالک ہیں جو 2030 ء میں اس ایونٹ کی میزبانی کریں گے اور ٹورنامنٹ میں شرکت کے لیے خودبخود کوالیفائی کریں گے”۔

بیان میں مزید کہا گیا: “اس کے علاوہ، اور پہلے ورلڈ کپ کے تاریخی تناظر کو مدنظر رکھتے ہوئے، فیفا کونسل نے متفقہ طور پر ٹورنامنٹ کی صد سالہ تقریب کے موقع پر مونٹیویڈیو (یوروگوئے کا دارالحکومت) میں ایک منفرد تقریب منعقد کرنے پر اتفاق کیا ہے۔ عالمی کپ کے تین میچوں کے علاوہ بالترتیب یوراگوئے، ارجنٹائن اور پیراگوئے میں منعقد ہونے والے ہیں۔

خیال رہے کہ 2022 ء کا ورلڈ کپ قطر میں منعقد ہوا تھا۔ ارجنٹائن نے ٹورنامنٹ جیتا اور دفاعی چیمپئن ہے۔قطر میں 2022 ء ورلڈ کپ میں شرکت کرنے والی مراکش کی قومی ٹیم ٹورنامنٹ کے سیمی فائنل تک پہنچنے میں کامیاب رہی تھی۔

فیفا نے کہا کہ 2034 کا ورلڈ کپ ایشیا یا اوشیانا کے خطے میں منعقد کیا جائے گا، جس میں ان خطوں کی رکن ایسوسی ایشنز کو مدعو کیا جائے گا کہ وہ ٹورنامنٹ کی میزبانی کے لیے اپنی بولیاں جمع کرائیں۔