چکی کا آٹا مزید دو روپے مہنگا، فی کلو قیمت 78 روپے تک پہنچ گئی، غریب عوام پریشان

چکی کا آٹا ایک مرتبہ پھر مہنگا ہو گیا، چکی مالکان نے آٹے کی قیمت میں مزید دو روپے اضافہ کر دیا جس کے بعد آٹے کی فی کلو قیمت 76 روپے سے بڑھ کر 78 روپے تک پہنچ گئی ہے

عام آدمی کے لیے آٹے کی خریداری مشکل سے مشکل تر ہو گئی، چکی کا آٹا 2 روپے اضافے کے بعد 78روپے فی کلو ہو گیا۔ لاہور آٹا چکی اونرز ایسوسی ایشن نے آٹے کی نئی قیمت جاری کردی۔عوام کا کہنا ہے کہ آٹا مسلسل مہنگا ہورہا ہے، دو وقت کی روٹی کھانا مشکل ہوگیا۔ حکومت ریلیف دینے میں ناکام ہے۔

جنرل سیکرٹری لاہورآٹا چکی اونرز ایسوسی ایشن عبدالرحمن نے کہا کہ آٹے کی قیمت پنجاب میں گندم کی شدید قلت کے باعث بڑھ رہی ہے، غلہ منڈیوں میں گندم2500 روپے فی من تک پہنچ گئی، حکومت گندم بحران پر قابو پانے میں ناکام ہے۔

واضح رہے کہ گزشتہ ماہ بھی چکی مالکان نے آٹے کی فی کلو قیمت میں چار روپے اضافہ کیا تھا اور اب رواں ماہ کے آغاز پر پھر دو روپے بڑھا دئیے گئے ہیں۔