15 یونیورسٹیز کو ملک کی بہترین جامعات کا درجہ دینے کی تجویز منظور

اسلام آباد: وزیراعظم عمران خان نے 15 یونیورسٹیز کو ملک کی بہترین جامعات کا درجہ دینے کی تجویز منظور کر لی ہے۔

وزیراعظم عمران خان کی زیر صدارت اعلیٰ سطح کا اجلاس اسلام آباد میں ہوا، جس میں وزیراعظم ہاؤس میں جدید ترین انجینئرنگ یونیورسٹی کے قیام پر پیشرفت کا جائزہ لیا گیا۔ تحقیق کے قومی سینٹر، مصنوعی ذہانت سے متعلق پروگرامز پر بھی غور کیا گیا۔

اجلاس میں وفاقی وزیر فواد چودھری، پروفیسرعطاء الرحمان نے بھی شرکت کی۔ وفاقی وزیر فواد چودھری نے وزیراعظم عمران خان کو وزارت کے مختلف اقدامات پر بریفنگ دی جب کہ پروفیسر عطاء الرحمان نے اپنی ٹاسک فورس کی اب تک کی کارکردگی سے آگاہ کیا۔

وزیراعظم نے یونیورسٹیز کو اپنی تحقیق کی بنیاد پر کمرشل منصوبے شروع کرنے کی تجویز پر غور کی ہدایت کی۔ اجلاس میں مستحق طلباء کے لیے قومی سطح پر سکالر شپ سکیم کا بھی جائزہ لیا گیا۔ سکالر شپ احساس پروگرام سے منسلک ہو تاکہ مستحق طلباء تعلیم مکمل کرسکیں۔ صعنتی شعبے کو بھی تحقیق اور ترقی کے منصوبوں میں اہم کردار ادا کرنا چاہیے۔

بریفنگ کے دوران بتایا گیا کہ ٹاسک فورس ٹیکس وصولی کے لیے ایف بی آر اور نادرا میں رابطہ کا کردار ادا کر رہی ہے۔ جبکہ وزیراعظم نے سائنسی و تیکنیکی تعلیم و تحقیق میں وزارت کے اقدامات کو سراہا۔

عمران خان کا کہنا تھا کہ زراعت کے شعبے میں بھی جدید ٹیکنالوجی کے استعمال کو ترجیح دی جائے جبکہ وزیراعظم نے 15 یونیورسٹیز کو ملک کی بہترین جامعات کا درجہ دینے کی تجویز منظور کر لی ہے۔