کھیلوں کی دنیا سے اچھی خبر۔۔پاکستان کو بین الاقوامی چیمپئین شپ کرانے کی اجازت

اسلام آباد: کھیلوں کی دنیا سے پاکستان کے لیے اچھی خبر یہ ہے کہ پروفیشنل اسکواش ایسوسی ایشن نے پاکستان کو نومبر میں بین الاقوامی چیمپئین شپ کرانے کی اجازت دے دی۔

پاکستان اسکواش فیڈریشن نے بین الاقوامی مقابلوں کی میزبانی ملنے کی تصدیق کر دی، چیف آف ایئر اسٹاف انٹرنیشل اسکواش چیمپئن شپ کا انعقاد نومبر کے پہلے ہفتے میں ہوگا،7 سے 77 نومبر تک جاری رہنے والے ایونٹ میں کئی انٹرنیشل اسٹارز شرکت کریں گے۔

سیکرٹری پاکستان اسکواش فیڈریشن طاہرسلطان کے مطابق مینز ایونٹ کی انعامی رقم 30 ہزار امریکی ڈالرز ہو گی جبکہ خواتین ایونٹ کی انعامی رقم 10 ہزار امریکی ڈالرز ہو گی،انہوں نے کورونا کے فورا بعد بین الاقوامی ایونٹ کی میزبانی ملنے کو خوش آئند قرار دیا ہے۔

 بات جاری رکھتے ہوئے طاہر سلطان نے کہا کہ ایونٹ میں دنیا کے بہترین کھلاڑی شریک ہوں گے جس سے نوجوان پاکستانی کھلاڑیوں کو بہت تجربہ ملے گا، یہ ایونٹ اس لحاظ سے بھی بہت اہم ہے کہ پاکستان کے سابق نمبرون کھلاڑی ناصر اقبال بھی اس ایونٹ میں چار سالہ پابندی کے بعد شرکت کر رہے ہیں، ناصر اقبال پر ڈوپنگ قوانین کی خلاف ورزی پر چار سال سے پابندی عائد تھی۔