سابق امریکی صدر ایچ ڈبلیوبش 94 سال کی عمر میں انتقال کرگئے

نیویارک: سابق امریکی صدر ایچ ڈبلیوبش چورانوے سال کی عمر میں ہیوسٹن میں انتقال کرگئے۔۔۔وہ انیس سو نواسی سے ترانوے تک امریکا کے صدر رہے۔

امریکا کے 41 ویں صدر جارج ایچ ڈبلیوبش خون میں انفیکشن کی وجہ سے ہیوسٹن کے اسپتال میں زیرعلاج تھے۔ سینئر بش 1989 سے 1993 تک امریکا کے صدر رہے۔ وہ سابق امریکی صدر جارج ڈبلیو بش کے والد تھے۔

ان کے ایک صاحبزادے جب بش فلوریڈا کے گورنر رہ چکے ہیں۔ جارج ایچ ڈبلیو بش نے چار دہائی سے جاری سرد جنگ کے خاتمے میں اہم کردار اداکیا۔

انہوں نے سویت یونین کے ٹوٹنے پر ایٹمی خطرات کو کم کرنے کے علاوہ 1991 میں کویت سے عراقی فوجوں کو نکال باہر کرنے میں بھی کردار ادا کیا۔

سابق صدر بش کانگریس کے رکن، اقوام متحدہ اور چین میں سفیر رہنے کے علاوہ خفیہ ادارے سی آئی اے کے سربراہ بھی رہے۔