بیجنگ ایران کی خود مختاری، سیکیورٹی اور قومی وقار کے دفاع کی حمایت کرتا ہے:چینی وزیرِ خارجہ

چین کے وزیرِ خارجہ وانگ یی نے کہا ہے کہ بیجنگ ایران کی خود مختاری، سیکیورٹی اور قومی وقار کے دفاع کی حمایت کرتا ہے۔

فون پر ہونے والی گفتگو میں وانگ یی نے تہران میں حماس کے رہنما اسماعیل ہنیہ کے قتل کی مذمت کے مؤقف کو دھرایا۔

گزشتہ ماہ کے آخر میں اسماعیل ہنیہ کو ایران کے دارالحکومت میں قتل کیا گیا تھا۔ وانگ یی کا کہنا تھا کہ یہ حملہ ایران کی خود مختاری پر حملہ ہے جب کہ اس سے خطے کے استحکام کو دھچکا لگا ہے۔

وانگ یی نے ایران کے قائم مقام وزیرِ خارجہ علی باقری کانی سے گفتگو میں مزید کہا کہ اسماعیل ہنیہ کے قتل سے غزہ میں جنگ بندی سے متعلق جاری مذکرات کو براہِ راست دھچکا لگا۔

ان کے بقول اس سے خطے کے امن و استحکام کو بھی نقصان پہنچا ہے۔

چینی وزارتِ خارجہ کے بیان کے مطابق وانگ یی کا مزید کہنا تھا کہ چین ایران خود مختاری، سیکیورٹی اور قومی وقار کے قانون کے مطابق دفاع کی حمایت کرتا ہے اور اس کے خطے کے امن اور استحکام کے اقدامات کا بھی حامی ہے۔

ان کے بقول بیجنگ تہران کے ساتھ قریبی رابطے رکھنے کے لیے تیار ہے۔

مزید خبروں کیلئے وزٹ کریں