وانا، جنوبی وزیرستان میں دھماکہ: 7 افراد جاں بحق، 15 زخمی

وانا: جنوبی وزیرستان کے علاقے وانا میں ایک افسوسناک دھماکے کے نتیجے میں 7 افراد جاں بحق اور 15 زخمی ہو گئے۔
ڈپٹی کمشنر کے مطابق دھماکے کا نشانہ امن کمیٹی کے رہنما تھے۔ زخمیوں کو فوری طور پر ڈسٹرکٹ ہیڈکوارٹر ہسپتال وانا منتقل کیا جا رہا ہے، جہاں ایمرجنسی نافذ کر دی گئی ہے۔

ڈپٹی کمشنر نے بتایا کہ دھماکے کے نتیجے میں کئی افراد ملبے تلے دب گئے ہیں۔ امدادی ٹیمیں ملبے تلے دبے افراد کو نکالنے کے لیے کارروائیاں جاری رکھے ہوئے ہیں۔

وفاقی وزیر داخلہ محسن نقوی نے دھماکے کی شدید الفاظ میں مذمت کی ہے۔ انہوں نے قیمتی انسانی جانوں کے ضیاع پر گہرے دکھ اور افسوس کا اظہار کیا اور جاں بحق افراد کے لواحقین سے دلی ہمدردی اور تعزیت کی۔
محسن نقوی نے زخمیوں کی جلد صحتیابی کے لیے بھی دعا کی اور کہا کہ معصوم لوگوں کی جانوں سے کھیلنے والے عناصر کسی رعایت کے مستحق نہیں۔ ان کا مزید کہنا تھا کہ بزدلانہ کارروائیاں قوم کے پختہ عزم کو کمزور نہیں کر سکتیں۔

واقعے کی تحقیقات جاری ہیں اور سکیورٹی ادارے علاقے کو گھیرے میں لے کر مزید شواہد اکھٹے کر رہے ہیں۔