پاکستانی امریکن کانگریس کا نو مئی واقعات پر امریکی صدر جوبائیڈن کو خط

اسلام آباد : پاکستانی امریکن کانگریس نے نو مئی واقعات پر امریکی صدر جوبائیڈن کو خط لکھ دیا۔ خط میں کہا گیا کہ انسانی حقوق پرمبنی افواہیں غلط ہیں۔نو مئی کی شرپسندی ایک منظم سازش تھی جو پاکستان کو اندرونی طور پر کمزور کرنے کی طویل منصوبہ بندی کا نتیجہ تھی۔

خط میں کہا گیا ہے کہ پاکستان اور امریکہ کے تعلقات کی بنیاد ہمیشہ باہمی احترام، جمہوریت اور انسانی وقار کی پاسداری پہ رکھی گئی ہے۔کچھ عناصر کی جانب سے پاکستان پر انسانی حقوق کی خلاف ورزیوں کا الزام بے بنیاد اور ذاتی مفادات پر مرکوز گروہوں کی طرف سے غلط معلومات پر منحصر ہے۔ 9 مئی کو سینکڑوں شرپسندوں نے قومی یکجہتی کی علامات کو تباہ کردیا۔

خط میں کہا گیا کہ 9 مئی کا سانحہ کوئی اتفاقی عمل نہیں تھا بلکہ پاکستان کو اندرونی طور پر کمزور کرنے کی طویل منصوبہ بندی کا نتیجہ تھا۔ شرپسندی میں ملوث افراد کے خلاف قانونی کارروائی جمہوری روایات اور اصولوں کے دائرے میں رہ کر کی گئی۔

خط میں 6 جنوری 2021 میں واشنگٹن ڈی سی پر ہونے والے حملے کا حوالہ بھی دیا گیا ہے کہ کیسے ان حملہ آوروں اور شر پسندوں سے آہنی ہاتھوں سے نمٹا گیا۔