اگر وزیراعظم کے استعفیٰ پربات نہیں کرنی تو پھر حکومتی رابطے کی ضرورت نہیں، اکرم درانی

اسلام آباد: متحدہ اپوزیشن کی رہبر کمیٹی کے کنوینئر اکرم درانی نے کہا ہے کہ حزب اختلاف کی تمام جماعتیں وزیراعظم کے استعفے اور نئے انتخابات کے مطالبے پر قائم ہیں۔

رہبر کمیٹی کے اجلاس کے بعد اپوزیشن رہنماؤں کے ہمراہ پریس کانفرنس کرتے ہوئے اکرم خان درانی کا کہنا تھا کہ آج رہبرکمیٹی کے اجلاس میں مختلف امور زیرغور آئے، اپوزیشن کی تمام 9 جماعتیں وزیراعظم عمران خان استعفے  اور نئے انتخابات کے مطالبے پر قائم یں۔

ان کا کہنا تھا کہ آج تمام سیاسی جماعتوں کا اتفاق ہے کہ آزادی مارچ کے مقاصد اور وزیراعظم کے استعفے اور فوج کی نگرانی کے بغیر نئے انتخابات کے مطالبے کو آگے بڑھایا جائے گا، ڈی چوک جانا ابھی زیرغور نہیں، دیگرآپشنز پر مشاورت جاری ہے۔

رہبر کمیٹی کے سربراہ نے بتایا کہ تمام غیر جمہوری قوتوں کو خبردار کرتے ہیں اگر ماورائے آئین اقدام کیا تو تمام جماعتیں احتجاج کریں گی، ہمارے پاس دیگر آپشنز بھی موجود ہیں، پارلیمنٹ سے مشترکہ استعفے، ہائی ویز کی بندش اور اضلاع کی سطح پر احتجاج بھی زیرغور ہے۔

انہوں نے کہا کہ معاہدے سے اپوزیشن نہیں بلکہ حکومت بھاگ رہی ہے، وعدے کے  برعکس میرے ساتھ آنے والے قافلوں کو روکا گیا، ہمارے مریضوں کو اسپتالوں میں علاج کی سہولیات فراہم نہیں کی جارہیں، ہم رابطے سے انکاری نہیں ہیں لیکن وزیراعظم اور وزیردفاع پرویز خٹک کا لب ولہجہ درست نہیں، ہم بات کرنے کے لئے تیار ہیں لیکن اگر وزیراعظم کے استعفیٰ پربات نہیں ہوسکتی تو پھررابطے کی کیا ضرورت ہے۔