عدلیہ مخالف تقریر: وزیراعظم کیخلاف توہین عدالت کی درخواست ہائیکورٹ میں سماعت کیلئے مقرر

اسلام آباد: وزیراعظم عمران خان کی مبینہ طور پر عدلیہ کے خلاف متنازع تقریر پر درخواست اسلام آباد ہائی کورٹ میں سماعت کے لیے مقرر کردی گئی ہے۔

عدالت عالیہ میں سمیع اللہ خان ایڈووکیٹ کی جانب سے درخواست دائر کی گئی جس میں موقف اختیار کیا گیا کہ 18 نومبر کو عمران خان کی تقریر میں اعلی عدلیہ کو اسکینڈلائز کرنے کی کوشش کی گئی جب کہ تقریر کے متنازعہ حصہ کا ٹرانسکرپٹ درخواست کے ساتھ منسلک کر دیا گیا ہے۔

درخواست گزار کی جانب سے عدالت سے استدعا کی گئی ہے کہ وزیراعظم عمران خان کے خلاف توہین عدالت کی کارروائی شروع کی جائے کیوں کہ عمران خان کی تقریر توہین عدالت کے زمرے میں آتی ہے۔

دوسری جانب وزیراعظم عمران خان کی عدلیہ کے خلاف متنازع تقریر پر درخواست سماعت کے لیے مقرر کردی گئی ہے اور اسلام آباد ہائی کورٹ کے چیف جسٹس اطہر من اللہ کل درخواست پر سماعت کریں گے۔