امارات کرکٹ بورڈ کی نائنٹی 90 بیش کے نام سے نئی کرکٹ لیگ کرانے کی منظوری

امارات کرکٹ بورڈ کے چیئرمین شیخ نہیان بن مبارک النہیان نے نائنٹی 90 بیش کے نام سے متحدہ عرب امارات میں نئی ورلڈ کرکٹ لیگ کرانے کی منظوری دے دی۔

اس سلسلے میں امارات کرکٹ بورڈ اور شارجہ میں کام کرنے والی سینچری ایونٹ و سپورٹس ایف زیڈ سی کے درمیان معاہدے پر دستخط کئے گئے، سرکاری میڈیا کے مطابق اس تقریب میں شیخ نہیان بن مبارک النہیان اور عبدالرحمان بخاطرسمیت دیگر مہمان بھی موجود تھے۔

نائنٹی 90 بیش اپنی نوعیت کی پہلی عالمی لیگ ہے جس میں ایک اننگز 15 اوورز یعنی 90 بالز پر مشتمل ہوگی اور اس کا انعقاد تاریخی شارجہ کرکٹ سٹیڈیم میں 2022ء میں ہوگا۔ عبدالرحمان بخاطر نے کہا ہے کہ وہ یہاں کرکٹ کے ایک نئے دور کی رونمائی کے منتظر ہیں۔

انہوں نے کہا کہ میں شروع سے ہی متحدہ عرب امارات میں کرکٹ کے سفر کا حصہ رہا ہوں، میری کوشش ہے کہ کرکٹ کو یہاں ایک گھر میسر ہو سکے جبکہ کھیل کو بڑھاوا دینے اور اسے صحتمند رکھنے کے طریقے تلاش کرنے میں بھی مدد ملے۔ان کا مزید کہنا تھا کہ یہ نیا دلچسپ فارمیٹ صرف متحدہ عرب امارات میں ہی نہیں بلکہ پوری دنیا میں کھیل کے لئے بالکل نیا تجربہ اور کھیل کو پرکشش بنانے میں مددگار ثابت ہوسکتا ہے۔

واضح رہےکہ متحدہ عرب امارات میں نائنٹی 90 بیش کی تیاریاں زوروں پر ہیں۔ متعدد معروف عالمی بزنس ہاؤسز اور کریکٹنگ آئیکون اور بین الاقوامی کھلاڑی دستخط کرنے کے لئے تیار ہیں جس میں کرکٹ سٹارز اور ابھرتے ہوئے کھلاڑیوں کا ایک مرکب مل کرنائنٹی 90 بیش بال لیگ ٹورنامنٹ کا حصہ بننا ہے۔